Qazaqstannyń úsh kásibı bokshysy Sergeı Kovalevpen birge jattyǵyp júr
ASTANA. QazAqparat - Kásibı boksta Kazaqstannyń namysyn qorǵap júrgen Madııar Áshkeev (7-0, 3KO), Meıirim Nursultanov (1-0) pen Ashat Ýálıhanov (1-1, 1KO) Los-Andjeles qalasynda jartylaı aýyr salmaqtaǵy eks-chempıon, reseılik boksshy Sergeı Kovalevpen (30-1-1, 26KO) birge jattyǵyp júr, dep habarlaıdy QazAqparat tilshisi áleýmettik jelidegi «Qazaqstannyń kásibı boksy» tobyna silteme jasap.
«Aıta ketken jón, Kovalev pen Qazaqstan boksshylarynyń menedjeri - Egıs Klımas. Qazirgi kezde 28 jastaǵy Áshkeev kásibı bokstaǵy segizinshi jekpe-jegine daıyndalyp jatyr. Sáýirdiń 15-i kúni ol Konnektıkýtte (AQSh) amerıkandyq boksshy Shon Kemeronmen (10-2, 5KO) kezdesedi. Olardyń jekpe-jegi birinshi orta salmaq dárejesinde (154 fýntqa deıin - 69,9 keli) ótedi. Nursultanov penÝálıhanov ta sáýir aıynda óz jekpe-jekterin ótkizedi degen jospar bar», - delingen toptyń habarlamasynda.
Aıta keteıik, buǵan deıin reseılik Sergeı Kovalev amerıkandyq boksshy Andre Ýordtan utylyp, jartylaı aýyr salmaqtaǵy WBA, WBO men IBF belbeýlerinen aıyrylǵan bolatyn.
Reseıdiń buqaralyq aqparat quraldarynyń málimetine sáıkes, Sergeı Kovalev pen Andre Ýord arasyndaǵy revansh maýsymnyń 17-sinde ótýi múmkin.
