Qazaqstannyń úsh qalasynda juqpaly aýrýlar aýrýhanalary salynatyn boldy
NUR-SULTAN. QazAqparat – QR Densaýlyq saqtaý mınıstrliginiń usynysy boıynsha Nur-Sultan, Almaty jáne Shymkent qalalarynda tez turǵyzylatyn qurylymdardan úsh juqpaly aýrýlar aýrýhanalaryn salý týraly sheshim qabyldandy.
Bul týraly QR Premer-Mınıstri Asqar Mamınniń tóraǵalyǵymen QR Prezıdenti janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń selektorlyq otyrysynda málim boldy, dep habarlaıdy QR Úkimetiniń resmı saıty.
Saıttan málim bolǵanyndaı, Memlekettik komıssııa Shymkent qalasy ákiminiń bıylǵy 4 sáýir kúngi saǵat 21:00-den bastap qalada karantın engizý týraly usynysymen kelisti. Aýrýhanaishilik juqpaly aýrýlardyń aldyn alý maqsatynda Úkimet basshysy ákimderge ınfektsııalyq, provızorlyq jáne karantındik nysandardaǵy sanıtarlyq talaptardyń múltiksiz saqtalýyn qamtamasyz etýdi tapsyrdy.
Densaýlyq saqtaý mınıstrliginiń usynysy boıynsha Nur-Sultan, Almaty jáne Shymkent qalalarynda tez turǵyzylatyn qurylymdardan úsh juqpaly aýrýlar aýrýhanalaryn salý týraly sheshim qabyldandy. Indýstrııa jáne ınfraqurylymdyq damý mınıstrligine múddeli memlekettik organdarmen birlesip, TJ kezeńinde jeke qorǵanysh quraldaryn shyǵarýǵa baqylaýdy qamtamasyz etý boıynsha qajetti sharalardy qabyldaý, Densaýlyq saqtaý mınıstrligi men ákimdikterge tirshilikti qamtamasyz etý obektilerinde qaýipsizdik pen jumys isteýdiń jekelegen algorıtmin ázirleý tapsyryldy.
Otyrys barysynda Jumyspen qamtýdyń jol kartasyn (JQJK) sapaly júzege asyrý, onyń ishinde Nur-Sultan, Almaty, Shymkent qalalary men basqa da óńirlerde naqty jobalardy tez arada bastaý máselelerine erekshe nazar aýdaryldy. Oǵan qosa Úkimet basshysy ákimderge kem degende 240 myń jumys ornyn qurýdy, otandyq óndirýshilerdiń taýarlary men qyzmetteriniń keminde 90%-yn paıdalanýdy qamtamasyz etýdi, JQJK aıasynda jumysqa ornalastyrý úshin mobıldi rekrýt pýnktterin qurýdy, jumyssyzdardy jobalarǵa Elektrondyq eńbek bırjasy arqyly tartýdy tapsyrdy.
Premer-Mınıstr tótenshe jaǵdaı kezinde tabysynan aıyrylǵandardyń tólem alýy (42 500 teńge) úshin azamattarǵa esepshot ashý jumystaryn qamtamasyz etý qajettigin atap ótti. Memlekettik komıssııa mektep oqýshylarynyń tórtinshi toqsanda qashyqtan oqý máselesin qarastyrdy.
«Bilim jáne tsıfrlyq damý mınıstrlikterine qashyqtan oqytý protsesine monıtorıng júrgizip, ádistemelik qoldaý kórsetýdi tapsyramyn», - dedi A. Mamın.
Azyq-túlik qaýipsizdigin qamtamasyz etý jáne áskerı mindettilerdi Qarýly kúshterdiń aýmaqtyq áskerlerin jasaqtaý úshin arnaýly jıyndarǵa shaqyrý máseleleri, sondaı-aq ekonomıkanyń sektorlarynda tótenshe jaǵdaıdyń engizilýine baılanysty asa zardap shekkenderdi qyzmet túrleriniń tizimine engizý úshin qajetti usynystar qaraldy, olar 1 sáýirden 1 qazan aralyǵynda eńbekaqy tóleý qorynan salyqtar men basqa da mindetti tólemderdi tóleýden bosatylady.
