Qazaqstannyń úsh qalasynda medqyzmetkerler koronavırýs juqtyrǵan

NUR-SULTAN. QazAqparat - Qazaqstannyń birneshe óńirinde medıtsına mamandary koronavırýs ınfektsııasyn juqtyrǵan. Bul týraly QR Bas memlekettik sanıtar dárigeri Aıjan Esmaǵambetova aıtyp berdi, dep habarlaıdy QazAqparat tilshisi.

«Jańa qaýlyda medıtsına qyzmetkerleriniń ınfektsııalyq qaýipsizdigin qamtamasyz etý algorıtmi men jumys jaǵdaıyna, naýqastarmen baılanysqa qaraı jeke qorǵanys quraldaryn qoldaný talaptary arnaıy qosymshada bekitildi. Bul taraý óte mańyzdy ári ózekti, koronavırýspen kúreste aldyńǵy shepte turǵan medıtsınalyq mamandardy qorǵaýymyz qajet», - dedi bas sanıtarlyq dáriger Ortalyq kommýnıkatsııalar qyzmetinde ótken brıfıngte.

Onyń aıtýynsha, elimizdiń birneshe óńirinde medıtsınalyq mamandar vırýs juqtyrǵan.

«Nur-Sultan, Almaty jáne Qaraǵandy qalalarynda koronavırýs ınfektsııasyn juqtyrý qaýpi bar toppen tikeleı baılanysta bolǵan medıtsına qyzmetkerleriniń indet juqtyrý jaǵdaılary tirkeldi», - dedi A. Esmaǵambetova.

Aıta keteıik, Qazaqstanda koronavırýs ınfektsııasyn juqtyrǵan 372 adam bar. 24 adam bul aýrýdan emdelip shyqty jáne 3 adam kóz jumdy.

Buǵan deıin A. Esmaǵambetova koronavırýs ınfektsııasynan qaıtys bolǵandardy jerleý algorıtmin túsindirgen edi.

Qazaqstanda COVID-19 juqtyrǵandardyń 70% naýqaspen baılanysta bolǵan. Almaty men Nur-Sultan qalalarynda koronavırýs ınfektsııasy bir adamnan 2-7 adamǵa juqqan.