Qazaqstannyń úsh qalasynan Mysyrǵa áýe joldary ashylady
ASTANA. QazAqparat - Qazaqstannyń úsh qalasynan Mysyrǵa charterlik reıster ashylady, dep habarlaıdy «QazAqparat» HAA tilshisi.
Shilde aıynan bastap qazaqstandyq týrıster Astana, Almaty jáne Atyraý qalalarynan Mysyrdyń Sharm el-Sheıh kýrorttyq qalasyna qoljetimdi baǵamen usha alady.
Búgin Astanada Qazaqstan Respýblıkasyndaǵy Egıpet elshisi Haısam Salah Kamel Ibragımniń qatysýymen ótken baspasóz máslıhatynda Mysyr saparynyń qazaqstandyq týrısterge tıimdi tustary talqylandy.
«Sharm-el-Sheıh qalasyndaǵy qonaq úılerdiń 90 paıyzy balalardy tegin ornalastyrady, bul qazaqstandyq januıalar úshin asa mańyzdy. Taǵy bir atap óter jaıt, jańa reıs arqyly týrısterdiń qarajaty aıtarlyqtaı únemdeledi, sebebi bıyl Sharm-el-Sheıh áýejaıy týrıstik reısterge arnaıy tómendetilgen tarıf engizdi, osy arqyly bılet quny edáýir tómendemek. Sondaı-aq atalǵan kýrortty aımaqqa baratyn jolaýshylar Mysyr aýmaǵyna vızasyz kire alady. Osylaısha, qazaqstandyq týrıster úshin servısi damyǵan bes juldyzdy qonaq úıdegi 10 kúndik demalys shamamen 200 myń teńgeni quraıdy», - dedi «KAZUNION» týrıstik operatory kompanııasynyń dırektory Qýanysh Baıtursynov.
Týrıstik operator ókilderi keltirgen derekterge súıensek, naýryz aıynda 5 myńnan astam qazaqstandyq týrıst Mysyrǵa barǵan. Qazirgi ýaqytta charterlik reıster arqyly aı saıyn 3-4 myńǵa jýyq qazaqstandyq Sharm-el-Sheıhke saparlaıdy dep josparlanyp otyr.
