Qazaqstannyń Ulttyq ıadrolyq ortalyǵy 25 jyldyǵyn atap ótýde
19 mamyr kúni Kýrchatovta halyqaralyq keńes ótip, onyń jumysyna óńir basshysy Danıal Ahmetov, energetıka vıtse-mınıstri Baqytjan Jaqsalıev qatysty.
Mereıtolyq dataǵa oraılastyrylǵan halyqaralyq sharaǵa Qazaqstan, Reseı, AQSh, Frantsııa, Japonııa, Belarýs jáne Ázerbaıjan elderiniń ǵalymdary jınaldy. Semınar aıasynda «QR Ulttyq ıadrolyq ortalyǵy» RMK jáne «N.A.Dollejal atyndaǵy ǵylymı-zertteý jáne konstrýktorlyq energotehnıka ınstıtýty» AQ arasynda ǵylymı-tehnıkalyq yntymaqtastyq jónindegi kelisimshartqa qol qoıyldy, dep habarlaıdy QazAqparat ShQO-nyń aqparat ortalyǵyna silteme jasap.
Ulttyq ıadrolyq ortalyǵy 25 jylda synaq júzindegi zertteýler men ıadrolyq reaktorlardyń ınnovatsııalyq jobalary salasynda álemdik kóshbasshyǵa aınaldy. Elde ǵylymdy damytýǵa jáne atom energetıkasyn beıbit maqsatta paıdalanýǵa úlken kóńil bólinedi.
Іs-shara barysynda oblys ákimi atap ótkendeı, bul baǵyttaǵy jumystardyń negizgi úlesi QR Prezıdenti Nursultan Nazarbaevqa tıesili.
«Dál bizdiń Prezıdent memleket basshylary arasynda birinshi bolyp ıadrolyq synaq alańyn japty. Qazaqstan erikti túrde álemdegi tórtinshi ıadrolyq áleýetinen: 1200 ıadrolyq oqtumsyǵy bar 110 ballıstıkalyq zymyrannan bas tartyp, el qaýipsizdiginiń halyqaralyq kepildigin aldy. Ortalyq Azııany ıadrolyq qarýdan ada aımaq retinde jarııalady jáne búginde quramyna 21 memleket enip otyrǵan Azııadaǵy ózara is-qımyl jáne senim sharalary jónindegi keńestiń bastamashysy boldy», - dedi D.Ahmetov.
Kýrchatovta «Tokamak termoıadrolyq materıaltaný reaktoryn qurý» biregeı zertteý qondyrǵysynyń qurylysy aıaqtalýǵa jaqyn. Ol termoıadrolyq sıntez salasynda zertteýler júrgizýge múmkindik beredi. Joba «Bolashaq energııasy» taqyrybymen ótetin EKSPO-2017 kórmesinde óziniń laıyqty ornyn tabatyn bolady.
