Qazaqstannyń Ulttyq murajaıy kólemi jaǵynan álemdegi eń iri mýzeılerdiń alǵashqy ondyǵyna enip otyr
ASTANA. QazAqparat - Qazaqstannyń Ulttyq murajaıy kólemi jaǵynan álemde alǵashqy ondyqqa kiredi. Bul týraly Ortalyq kommýnıkatsııalar qyzmetinde ótken brıfıngte Qazaqstan Respýblıkasy Ulttyq murajaıynyń dırektory Darhan Myńbaı málim etti.
Onyń aıtýynsha, atalmysh murajaıdyń Ortalyq Azııada teńdesi joq.
«Murajaıdyń erekshelikteri óte kóp. Onyń aýmaǵynyń ózi 74 myń sharshy metrdi quraıdy. Ermıtaj 180 myń sharshy metr, Lývr - 160 myń, Metropolıten degen Amerıkanyń keremet mýzeıi - 110 myń sharshy metr, Tretıakov galereıasy 70-75 myńdaı, Koreıa mýzeıiniki - 135 myń sharshy metr. Bizdiń murajaı jalpy kólemi jaǵynan álemde alǵashqy ondyqqa kiredi», - deıdi D.Myńbaı. Murajaı basshysynyń sózine qaraǵanda, qazirgi ýaqytta keshenniń ishin baǵaly eksponattarymen toltyrý jumystary qarqyn alǵan. «Másele kólemin ǵana aıtý emes, ondaǵy eksponattardyń mazmundyq jaǵynan aldyńǵy qataryna shyǵýymyz kerek. Oǵan barlyq múmkindikterimiz bar. Jaqsy jádigerler ortaq bolýy tıis. Sondyqtan bizdiń jeke kollektsıonerler osy ulttyq murajaıdyń qoryna qundy zattardy tapsyryp jatyr. Oǵan úlken alǵysymyzdy bildiremiz. Ol tarıhı qundylyq bolyp sanalady. Sondyqtan ózderinde saqtalmaı qalýy múmkin baǵaly zattardy osy murajaıǵa kelip tapsyryp jatyr. Bul jaqsy úrdis jáne dástúr bolyp qalýy tıis», - dep atap ótti ol. Murajaıda zamanaýı tehnologııalarǵa ıe arnaıy zerthanalar men ǵylymı ortalyqtar ashylǵan. Olar tarıhı jádigerlerdi saqtaý, ony zertteý jáne qalpyna keltirý jumystarymen aınalysatyn bolady. Qazirgi ýaqytta Eýropanyń, Reseıdiń tanymal murajaılarymen jáne kýratorlarymen áriptestik ornatylyp, tıisti kelisimshattar jasalýda. Aıta keteıik, osydan birer kún buryn QR Prezıdenti N.Nazarbaevtyń qatysýymen murajaıdyń ashylý saltanaty ótken bolatyn. D.Myńbaıdyń habarlaǵanyndaı, keshenge kirý aqysy zeınetkerlerge, oqýshylarǵa jáne múgedekterge jeńildetilgen baǵamen satylady.
