Qazaqstannyń ulttyq quramalary oqý-jattyǵý jıyndaryn bastady
NUR-SULTAN. QazAqparat – Qazaqstandyq sportshylar oqý-jattyǵý jıyndaryn bastady, dep habarlaıdy QazAqparat.
«Karantın jaǵdaıynda oqý-jattyǵý jıyndaryn uıymdastyrý jáne baqylaý úshin qurylǵan Ulttyq Olımpıada komıtetiniń jedel shtaby ulttyq quramalardyń oqý-jattyǵý jıyndaryn ótkizýdi jáne uıymdastyrýdy qaıta bastaý týraly sheshim qabyldady», - delingen Ulttyq Olımpıada komıtetiniń málimetinde.
Ulttyq Olımpıada komıteti akkredıttegen mamandandyrylǵan sport bazalary jattyǵý protsessterin sanıtarlyq-dezınfektsııalyq rejımdi tolyq saqtaı otyryp júrgizetin bolady.
«Oqý-jattyǵý jıyndaryna qatysatyn tulǵalardyń barlyǵynyń qaýipsizdigin qamtamasyz etý – basty maqsatymyz bolyp qala beredi. Qaýipti azaıtý jáne ulttyq quramalarǵa tolyqqandy daıyndyqty uıymdastyrý úshin UOK-tiń barlyq qyzmetteri, federatsııalar men sporttyq bazalardyń ákimshilikteri jattyǵý jıynyn jalǵastyrý protsesin pysyqtady. Karantın rejıminiń uzaqqa sozylýy sportshylardyń formasyna áser etkeni sózsiz. Sondyqtan jattyqtyrýshylardyń ózderi de, sportshylar da oqý-jattyǵý jıynynyń qaıta bastalýyn taǵatsyzdana kútti. Jedel shtab sport nysandaryndaǵy sanıtarlyq normalardyń saqtalýyn baqylaýdy kúsheıtti jáne biz barlyq taraptarǵa olardyń kásibı jumysy men túsinistik tanytqany úshin rızashylyǵymyzdy bildiremiz. Biz bárimiz sporttyń qaıta oralǵanyn qalasaq ta, eń bastysy sportshylar men jattyqtyrýshylardyń densaýlyǵyna qaýip tóndirmeýdi basty maqsatymyz dep bilemiz. Sondyqtan, barlyq talapty qatań saqtaımyz», - deıdi Qazaqstan Ulttyq Olımpıada komıtetiniń bas hatshysy Andreı Krıýkov.
Jattyǵý jıyny kezinde nysandardyń daıyndyǵy, talapqa sáıkestigi jáne olardyń belgilengen normalardy saqtaýy jedel shtabtyń qatań baqylaýynda bolady. Sport nysandarynda barlyq sanıtarlyq normanyń saqtalýyn qamtamasyz etý úshin únemi tıisti tekserýler júrgiziledi.
Tamyzdyń úshinshi onkúndiginen bastap oqý-jattyǵý jıyndaryn ótkizip jatqan komandalar qataryna aýyr atletıka, frıstaıl, mánerlep syrǵanaý, shaıbaly hokkeı, kerlıng, sadaq atý, short-trek, gandbol jáne kórkem gımnastıka quramalary qosyldy.
