Qazaqstannyń Ulttyq kedendik kodeksiniń alǵashqy nusqasy aldaǵy jyldyń aqpanynda daıyn bolady
A. Jeltoqsannyń 21-i. QazAqparat /Rýslan Ǵabbasov/ - Qazaqstannyń ulttyq kedendik kodeksiniń alǵashqy nusqasy aldaǵy jyldyń aqpanynda daıyn bolady. Bul týraly búgin Astanada Keden odaǵynyń jańa kedendik kodeksin tanystyrý kezinde ótken brıfıngte QR Qarjy mınıstrligi Kedendik baqylaý komıteti tóraǵasynyń orynbasary Igor Ten málim etti,
dep habarlaıdy QazAqparat.
Komıtet Qazaqstannyń Ulttyq kedendik kodeksin aldaǵy jylǵy aqpannyń 15-ine qaraı ázirleýdi qarastyryp otyrǵanyna toqtalǵan ol «alaıda, Ekonomıka jáne bıýdjettik josparlaý mınıstrligi atalǵan kodeksti ázirleý jumystaryn, ıaǵnı aqpannyń 1-ine deıin onyń alǵashqy jazylǵan jobasyn aıaqtaýdy usynyp otyr. Biz osy usynyspen kelisetin shyǵarmyz. Sebebi, ýaqyt óte tyǵyz. Atap aıtqanda, 2010 jylǵy shildeniń 1-ine deıin Keden odaǵynyń Kedendik kodeksine de normatıvtik-quqyqtyq aktini daıarlaýymyz qajet», dedi ol brıfıng barysynda.
Onyń aıtýynsha, elimizdiń qazirgi Kedendik kodeksi boıynsha 2010 jylǵy shildeniń 1-ine deıin jumys istelinetin bolady. «Óıtkeni aldaǵy jylǵy shildeden bastap Kedendik odaqtyń jańa Kodeksi kúshine enedi. Biraq, sonymen birge bizdiń Ulttyq kodeks atalǵan Kedendik odaqtyń kodeksine beıimdelip, onyń iske qosylýyn qalap otyrmyz»,-dedi I. Ten.
Onyń sózine qaraǵanda, Ulttyq kodeks elimiz kásipkerleriniń jumysyn ońtaılandyrýǵa negizdelmek.
Aıta keteıik, Keden odaǵy Kedendik kodeksi jobasynyń negizine Kedendik amaldardy ońtaılandyrý jáne úılestirý týraly halyqaralyq konventsııanyń (Kıoto konventsııasynyń) qaǵıdalary negiz bolyp otyr. Kedendik Odaqqa múshe memleketterdiń ishinen Qazaqstan ǵana Kıoto konventsııasyna qosylǵan bolatyn. Sondyqtan Keden odaǵynyń kedendik kodeks jobasyn ázirleý jónindegi jalpy jetekshilik qazaqstandyq tarapqa tapsyryldy.
