Qazaqstannyń ulttyq bı ónerin álemge pash etetin ımıdjdik joba - «AstanaBallet» horeografııalyq ujymy quryldy
ASTANA. 21 maýsym. QazAqparat - Búginde Qazaqstan qoǵamdyq-saıası, áleýmettik-ekonomıkalyq turǵyda órleý ústinde. Qarqyndy damý úrdisi mádenıet salasynda da aıqyn baıqalady.
Elimizde ónerdiń barlyq túrin damytý úshin jetkilikti jaǵdaı jasalǵan. Óner ujymdary men jeke oryndaýshylar Qazaqstan ónerin álemniń bedeldi sahnalarynda nasıhattap júr. Qazaqstan mádenıeti men ónerin odan ári ilgeriletý úshin ulttyq jáne álemdik horeografııa dástúrin ustanatyn jańa ujym qurý kerek boldy, - dep habarlaıdy astana.kz Astananyń 15 jyldyq merekesin ázirleý jáne ótkizý jónindegi uıymdastyrý komıteti shtabynyń medıatobyna silteme jasap.
«Astana Ballet» Qazaqstannyń ulttyq bı ónerin álemdik qoǵamdastyqqa kórsetetin ımıdjdik joba. Ujymnyń quramy A.Seleznev atyndaǵy Almaty horeografııa ýchılışesiniń túlekterinen turady. Ansambl quryltaıshysy - «N.Nazarbaevtyń mádenıet, bilim berý jáne áleýmettik baǵdarlamalar qory». Basty mindet - álemdik óner talabyna saı keletin, sonymen qatar ulttyq ereksheligi aıqyn jańa bı repertýaryn qalyptastyrý.
1 shildede, Astana kúni merekesi qarsańynda «Astana Ballet» horeografııalyq ujymynyń tusaýkeser kontserti ótedi. Kesh baǵdarlamasy dástúrli álem halyqtarynyń bılerinen jáne shet el klassıkasynan quralǵan. Daıyndyq barysynda horeografııa óneri salasyndaǵy úzdik otandyq jáne sheteldik mamandar tartyldy. Sonymen qatar kóztartar qoıylymdardy sahnalaýdyń áıgili sheberleri jumyldyryldy.
