Qazaqstannyń Ulttyq banki sáıkestendirý nómirlerin (SN) qoldanýǵa kóshý merzimin ózgertti
ASTANA. 27 jeltoqsan. QazAqparat - Qazaqstannyń Ulttyq banki sáıkestendirý nómirlerin (SN) qoldanýǵa kóshý merzimin ózgertti. Bul týraly respýblıkanyń qarjylyq uıymdary rettegishiniń kóshirme hatynda aıtylǵan.
«Qazaqstan Respýbltkasynyń Ulttyq banki sáıkestendirý nómirlerine kóshý merzimi (boljam boıynsha, 2012 jyldyń 1 shildesine deıin) ózgertilgendigi týraly habarlaıdy. SN-lerin qoldanýǵa kóshý merzimin ózgertýdi qarastyratyn Qazaqstan Respýblıkasynyń tıisti zań jobasy aldaǵy jaqyn ýaqytta QR Parlamentine engiziletin bolady», - delingen hattyń kóshirmesinde.
Osyǵan oraı Ulttyq bank, bankter, jınaqtaýshy zeınetaqy qorlary men qarjylyq uıymdarynan ózderiniń aqparattyq júıelerin JSN (jeke tulǵanyń jeke sáıkestendirý nómirleri) men BSN-dy (zańdy tulǵalardyń bıznes sáıkestendirý nómirleri) qoldanýǵa ıkemdeý jumystaryn toqtatýdy surady. 2011 jyldyń 31 jeltoqsanynan bastap engizilýi tıis jańa tártipterdiń kókjıegi 2012 jyldyń 3 qańtaryna deıin jyljytyldy.
Ulttyq bank, atalmysh suraqqa qatysty qosymsha málimetter tıisti zańnamalyq ózgertýler qabydanǵannan keıin taratylatynyn jetkizdi.
Eske salsaq, buǵan deıin, 2012 jyldyń 1 qańtarynan bastap Qazaqstan aýmaǵynda «Sáıkestendirý nómirleriniń ulttyq tizimderi týraly» zańnyń keıbir erejeleriniń iske asyryla bastaýyna baılanysty barlyq salalarda JSN-dar men BSN-dar qoldanyla bastaıtyndyǵy týraly habarlanǵan bolatyn.
Onymen qosa, JSN men BSN mindetti banktik rekvızıtter bolady dep kútildi. Olarsyz 2012 jyldyń alǵashqy kúninen bastap banktik operatsııalardy, solardyń ishinde zeınetaqylar men járdemaqylardy alý, aqsha aýdarymdary men tólemderdi jasaý, depozıt ashý, nesıe alý múmkin bolmaıdy dep boljaldy.
Onymen birmezgilde, aǵymdaǵy jylǵy jeltoqsannyń basynda QR ІІM-niń kóshi-qon polıtsııasy komıteti 250 myńǵa jýyq qazaqstandyqta JSN-nyń joqtyǵyn habarlaǵan bolatyn.
