Qazaqstannyń Ulttyq Banki naryqpen kommýnıkatsııalardy nyǵaıtýda
ALMATY. QazAqparat- Inflıatsııanyń targetteletin deńgeıin aldyn ala belgileý - kásiporyndar men jeke tulǵalarǵa óz josparlaryn aldyn ala quryp alýǵa múmkindik beredi. Bul týraly qarjy retteýshisiniń aqsha-kredıt saıasatynyń jáne jańa aqparattyq saıasatynyń erekshelikterin túsindirý masatynda búgin Almatyda QR Ulttyq Bank basshysynyń orynbasary Ǵalymjan Pirmatov málim etti.
Onyń aıtýynsha, bul óz kezeginde qoǵamda tıisti kútýlerdi qalyptastyrýǵa yqpal etedi.
«Inflıatsııanyń targetteletin deńgeıi aldyn ala belgilenedi, osyǵan baılanysty ortalyq banktiń barlyq aqparaty men josparlary aldyn ala qoljetimdi bolady. Al bul, kásiporyndar men jeke tulǵalarǵa óz josparlaryn qurýǵa múmkindik beredi», - dep túsindirdi QR Ulttyq Bank basshysynyń orynbasary.
Sonymen qatar, ol qoǵamnyń ortalyq bankke degen senimi, banktiń is-qımyldarynyń júıeliligine tikeleı baılanysty ekendigin aıtty.
«Osy turǵydan alyp qaraǵanda naryqpen tyǵyz baılanys ornatý úlken ról atqarady. Bul, ońtaıly saıasattyń basty elementi», - dedi Ǵ. Pirmatov.
Qazirgi tańda QR Ulttyq Banki elimizde keń aýqymdy aqparattyq-túsindirme jumysyn júrgizip otyr.
Ǵ. Pirmatovtyń aıtýynsha, búgingi tańda álemde aqsha-kredıt saıasatynyń jalpyǵa tanymal úsh túri bar. Olar: valıýta baǵamyn belgileý, ekinshi - monetarlyq targetteý jáne sońǵysy - ınflıatsııalyq targetteý.
Esterińizge sala ketelik, Qazaqstanda osyǵan deıin 2015 jylǵy 20 tamyzǵa deıin is júzinde aıyrbastaý baǵamyn belgileý saıasaty qoldanylyp kelgen. Qazirgi kezde Ulttyq Banktiń aqsha-kredıt saıasaty ınflıatsııalyq targetteý qaǵıdattaryna negizdeledi.
Bul rejım kóptegen elderde óte tanymal. Resmı túrde ınflıatsııalyq targetteý Avstralııada, Ulybrıtanııada, Kanadada, Ońtústik Koreıada, Jańa Zelandııada, Polshada, Chehııada jáne basqa memleketterde qoldanylady.
