Qazaqstannyń Ýkraınadaǵy jańa Qurmetti konsýly taǵaıyndaldy
«Ýkraınanyń Syrtqy ister mınıstrliginde Qazaqstannyń Dnepr qalasyndaǵy jańa Qurmetti konsýly Inna Medıanıkke konsýldyq ekzekvatýrany resmı tapsyrý sharasy ótti.
Ekzekvatýrany Ýkraına Syrtqy ister mınıstriniń orynbasary Evgenıı Enın Qazaqstannyń Ýkraınadaǵy Elshisi Darhan Káletaevtyń qatysýymen tapsyrdy», - dedi mınıstrlikten.
Taraptar eki el arasyndaǵy ózara is-qımyldyń barlyq salalarynda yntymaqtastyqty odan ári tereńdetýge senim bildirdi.
Aıta keteıik, Qurmetti konsýldyq – Qurmetti konsýl (shtattan tys) basshylyq etetin mekeme. Qurmetti konsýl ózi ókildik etetin elde memlekettik laýazym atqarmaıtyn, óz qyzmetin tegin negizde oryndaıtyn azamat. Onyń mindetine ózi ókildik etetin memleket pen onyń azamattarynyń quqyǵyn qorǵaý kiredi. Alaıda ol vıza jáne ózge de resmı qujattardy berý máselesine jaýap bermeıdi.
