Qazaqstannyń Túrkııadaǵy elshisi J.Túımebaev Túrkııanyń burynǵy prezıdenti Súleımen Demırelmen kezdesti
Bul týraly Qvazaqstan Respýblıkasynyń Túrkııa Respýblıkasyndaǵy elshiligi habarlap otyr.
Suhbat barysynda S.Demırel qazaq-túrik qarym-qatynasynyń strategııalyq áriptestik rýhta damyp kele jatqanyn aıta kelip, qazirgi áleýetine zor qanaǵattanatyndyǵyn bildirdi.
Ol Qazaqstan kóshbasshysynyń usynysy boıynsha tuńǵysh ret túrki áleminiń tarıhynda Parlamenttik assambleıa, Túrkitildes memleketterdiń Aqsaqaldar keńesi, Túrki akademııasy, sondaı-aq memleketaralyq organ - Túrkitildes memleketter yntymaqtastyǵynyń keńesi - Túrki keńesi qurylǵanyn ataı otyryp, Qazaqstan Respýblıkasynyń Prezıdenti N.Nazarbaevtyń túrki áleminiń aqsaqaly retindegi, baýyrlas elderimizdiń ekijaqty yntymaqtastyǵyn damytýdaǵy, túrkitildes elder arasyndaǵy ózara qatynastardy nyǵaıtýdaǵy jáne túrki álemindegi ıntegratsııalyq úderisterdiń damýyndaǵy orasan zor rólin atap ótti. «Qazaqstan Prezıdenti qazirgi zaman tarıhyndaǵy jarqyn tulǵalardyń biri bolyp tabylady, táýelsiz Qazaqstannyń gúldenýi tutas alǵanda onyń atymen baılanysty»- dedi S.Demırel.
Óz kezeginde elshi J.Túımebaev Elbasynyń eń izgi tilekterin jetkize otyryp, aldaǵy Astanada ótetin EQYU sammıti zańdy nátıjesi bolyp tabylatyn Qazaqstannyń EQYU-ǵa tóraǵalyǵy kezeńindegi negizgi is-sharalar men bastamalary týraly áńgimeledi.
S.Demırel Qazaqstannyń EQYU-ǵa tóraǵalyǵyn joǵary baǵalady jáne Qazaqstan astanasynda ótetin osy asa mańyzdy is-sharanyń tabysty ótetinine senimin bildirdi. «Qazaqstan Prezıdenti N.Nazarbaevtyń arqasynda Qazaqstan Ortalyq Azııa aımaǵyndaǵy turaqtylyqtyń saqtalýynda mańyzdy ról atqaryp otyr»,- dep atap kórsetti Túrkııanyń burynǵy prezıdenti. Ol sondaı-aq Túrkııanyń Qazaqstan táýelsizdigin alǵashqy mınýttarda birinshi tanyǵan el ǵana bolyp qoımaı, Qazaqstannyń 1994 jyly EQYU músheligine kirýin qoldaǵan birinshi memleket - EQYU múshesi bolyp tabylatynyn aıtyp ótti.
Áńgime sońynda S.Demırel QR Prezıdenti N.Á.Nazarbaevqa jáne Qazaqstan halqyna óziniń izgi tilekterin joldady jáne bizdiń elimizdiń aldaǵy Táýelsizdik Kúnimen quttyqtady.