Qazaqstannyń Túrkııadaǵy Elshisi qazaq jýrnalısterin qabyldady
Atalǵan kezdesý Qazaqstan men Túrkııa arasyndaǵy dıplomatııalyq qarym-qatynastardyń 25 jyldyǵyna jáne «Rýhanı jańǵyrý» baǵdarlamasyn júzege asyrý maqsatynda Qazaqstannyń Túrkııadaǵy elshiligi tarapynan arnaıy uıymdastyrylǵan baspasóz týry aıasynda ótkizildi.
«Túrkııadaǵy elshilik - táýelsiz Qazaqstannyń syrt memlekette ashylǵan alǵashqy elshilikteriniń biri. Men ol kezde Ankaradaǵy Taıaý Shyǵys tehnıkalyq ýnıversıtetiniń stýdenti edim. 1992 jyly bilim alýǵa keldik. Sol kezde elshiliktiń qalaı ashylǵany esimde qalypty. 1992 jyly 25 qazan aıynda Túrkııanyń Táýelsizdik kúni qarsańynda eki eldiń prezıdenti bas qosatyn boldy. Elshiliktiń ashylýy kúngi keshtegi oqıǵa áli esimde. Qas qaraıyp, aspanda aı kóringende, erekshe oqıǵa boldy. Jańa týǵan jarty aıdyń ortasyna juldyz qonyp, tabıǵattyń tamasha kórinisi boldy. Túrikter ózderiniń týyndaǵy kóriniske tańqalsa, biz muny jaqsyǵa yrymǵa joryp, qýandyq. Sol kúni Elbasymyz ben S.Demırel kezdesti. Prezıdentimiz qazaq stýdentterimen kezdesip, batasyn berdi. Elshiliktiń ashylýyna marqum Turǵyt Ozal da kelgen bolatyn», - dep eske aldy Qazaqstan Elshisi.
Abzal Saparbekuly Qazaqstan men Túrkııa qarym-qatynasyndaǵy alǵashqy kúnderdi eske ala otyryp, búgingi tańda atqarylyp jatqan mádenı baılanystarǵa toqtala ketti.
«Bıyl Elbasymyzdyń «Bolashaqqa baǵdar: Rýhanı jańǵyrý» maqalasy jaryqqa shyqty. Birinshi kúnnen bastap, túrik jurtshylyǵynda, zııaly qaýym ókilderi arasynda maqala qyzý talqylandy. Túrkııanyń zııaly qaýymy «bul tek qana Qazaqstannyń rýhanı jańǵyrýy bolmaýy kerek, bul jalpy túrki áleminiń manıfesi bolýy kerek» dep baǵalady. Bul jóninde eshkimge qolqa salyp, maqala jazdyryp, pikir suraǵanymyz joq. Bul - olardyń shynaıy pikiri. Kóp adam elshilikke hat jazyp, aqjarma tilekterin bildirip jatty. Bul halyqtyń shyn yqylasy. Sońǵy 1,5 jyl ishinde biz shamamen 30-dan astam kitapty túrik tiline aýdardyq. Endi eki eldiń baspalary arasynda baılanys ornatsaq degen oıymyz bar. Ondaǵy josparymyz kommertsııalyq múddege saı keletin kitaptardy aýdartyp, eki elde qalamgerlerdi tanyta túsý. Qazaq jazýshylary Túrkııadaǵy 80 mln halyqqa tanylsa, ar jaǵynda 10 mln ázerbaıjan biledi. Túrki áleminde kóptegen zııalylar túrikshe biletinin qossańyz, qazaq qalamgeri túrki álemine belgili bola túsedi. Endi osy ýaqytqa deıin túrik tiline aýdarylǵan kitaptardy jınaqtap, ortaq ınternet plaforma qursaq degen josparymyz bar»,- dedi elshi Abzal Saparbekuly.
Qazaqstan elshisi Táýelsizdigimizdi eń alǵashqy bolyp tanyǵan Túrkııanyń jaqsylyǵy eshqashan umytylmaıtynyn, sol kezde bastalǵan baýyrlastyq qatynas búgingi kúni de el arasyndaǵy baılanysqa serpin berip otyrǵanyn aıtty.
«Biz - Qudaı qosqan baýyrlas elmiz. Baýyrlas elder arasyndaǵy qarym-qatynas ta árdaıym názik, sezimtal bolady. Men túriktermen áńgime-dúken qurǵanda biz jaı memleketter emes, baýyrlas el ekenimizdi, bir birimizdiń qarym-qatynasymyz esepke qurylmaý kerektigin aıtamyn. Jalpy, Túrkııa memleketi Qazaqstannyń táýelsizdigin eń birinshi tanydy. Marqum Turǵyt Ozal birden telefon soǵyp, quttyqtaǵan bolatyn. Túrikter Elbasymyzdy «Túrki áleminiń Aqsaqaly» dep qurmetteıdi», - dedi Elshi.
Aıta keteıik, Túrkııada uıymdastyrylyp otyrǵan baspasóz týry eki eldiń dıplomatııalyq qarym-qatynastaryndaǵy jetistikter men aldaǵy josparlardy ári Túrkııanyń búgingi ahýalymen tanystyrýǵa arnalǵan. Baspasóz týry aıasynda qazaqstandyq jýrnalıster Ankara qalasynda Túrkııa úkimetine qarasty Túrik yntymaqtastyq jáne úılestirý agenttiginiń (TIKA) tóraǵa orynbasary Súreıa Ermen, Túrkııa úkimetine qarasty Baspasóz jáne aqparat bas dırektsııasynyń dırektory Mehmet Aqjarmen kezdesedi.
Sonymen qatar, qazaqstandyq delegatsııa Túrkııada 2016 jyly 15 shildede bolǵan tóńkeris áreketin kórý maqsatynda Túrkııa Uly ulttyq májilisine baryp, Túrkııa-Qazaqstan Parlamentteri arasyndaǵy Dostyq tobynyń tóraǵasy depýtat Halıýk Ipekpen kezdespek.
Túrkııadaǵy baspasóz týry aıasynda uıymdastyrylatyn mańyzdy shara 5 jeltoqsan kúni ótkizilmek. Ol kúni Qazaqstan men Túrkııa arasyndaǵy qarym-qatynastyń 25 jyldyǵyna arnalǵan halyqaralyq konferentsııa ótedi. Konferentsııa Túrkııa Úkimetiniń beldi músheleri men eks-prezıdent Abdýlla Gúl qatysady dep josparlanyp otyr.
Baspasóz týry aıasynda qazaq jýrnalısteri Túrkııanyń Antalııa qalasyna baryp, Mádenıet jáne týrızm basqarmasynyń dırektory Ibragım Ajarmen kezdesedi. Antalııadaǵy kezdesýden soń, delegatsııa Gazıantep qalasyndaǵy Sırııa bosqyndary ornalasqan Izıp-2 lagerin kóredi.
Túrkııadaǵy qazaq jýrnalısteriniń sapary 10 jeltoqsan kúni aıaqtalady.