Qazaqstannyń Túrkııadaǵy elshiligindegi saılaý ýchaskesi kezekten tys Parlamenttik saılaý ótkizýge ázir
YSTAMBUL. 13 qańtar. QazAqparat /Irına Dynnıkova/ - Kezekten tys QR Májilisi depýtattaryn saılaýǵa baılanysty Qazaqstannyń Túrkııadaǵy elshiliginde №230 saılaý ýchaskesi quryldy.
Ankaradaǵy saılaý ýchaskesi saılaý komıssııasynyń tóraǵasy, Túrkııadaǵy QR elshiliginiń keńesshisi Maqsat Saparbekovanyń aıtýynsha, Ankara qalasyndaǵy saılaý ýchaskesi Qazaqstan Parlamentiniń Májilisine saılaýdy ótkizýge tolyq ázir. «Atalǵan ýchaskide Túrkııada issaparda jáne t.b. jaǵdaılarmen júrgen Qazaqstan azamattarynyń, sondaı-aq osy eldiń túrli oqý oryndarynda oqıtyn qazaqstandyq stýdentterdiń saılaý barysynda óz konstıtýtsııalyq quqyqtaryn paıdalanýy úshin daýys berý kabınalary, saılaý bıýlletenderin salatyn jáshikter qoıylatyn oryndar daıyndaldy. Sonymen birge saılaýǵa túsetin partııalar baǵdarlamalary ilingen taqta ornatyldy»,- deıdi ol.
M.Saparbekovanyń atap ótýinshe, qazirgi kúni №230 saılaý ýchaskesi tolyq jabdyqtalyp boldy.
Ankara boıynsha saılaý quqyǵyna ıe jalpy 285 azamat tirkeldi.
