Qazaqstannyń Túrkııadaǵy elshiligi jaǵdaıy nashar otbasylarǵa kómek kórsetti

ASTANA. QazAqparat - 1 maýsym - Halyqaralyq balalardy qorǵaý kúnine oraı Qazaqstan Respýblıkasynyń Túrkııa Respýblıkasyndaǵy Elshiligi jáne Túrkııa aımaǵyndaǵy konsýldyq qyzmeti bólimsheleri Qazaqstandaǵy jaǵdaıy nashar otbasylarǵa qaıyrymdylyq kómek kórsetti. Bul jaıynda Elshiliktiń Feısbýktegi paraqshasynda jazylǵan, dep habarlaıdy QazAqparat.

«Qazaqstannyń Túrkııadaǵy dıplomatııalyq qyzmetiniń ókilderi kómekke zárý bolyp otyrǵan qazaqstandyq otbasylarynyń balalaryna qajetti kıim-keshek alyp, Ystanbuldan salyp jiberdi. Osyǵan oraı dıplomattarmen jıyn ótkizgen Qazaqstannyń Túrkııadaǵy Elshisi Abzal Saparbekuly «Otan otbasynan bastalady» degen qaǵıdaǵa basa nazar aýdara otyryp, elimizdiń bolashaǵy - balalardyń múshkil jaǵdaıyna nemquraıly qaraı almaıtyndyǵyn jetkizdi», - delingne FB jazbada.

 «Qazaqstannyń árbir azamaty óz otbasynan bastap, elimizdiń bolashaǵy úshin jaýapty. Bolashaqtyń jarqyn bolýy jas urpaqtyń ósip-órkendeýine, salaýatty ómir keshýine baılanysty. Osy sebepten qorǵaýǵa jáne kómekke zárý bolyp otyrǵan jaǵdaıy nashar otbasylaryna qol ushyn berý bárimizge ortaq paryz», - degen Elshi kómekke muqtaj jandardyń qasynan tabyla bilgen dıplomattardyń osy qaıyrymdylyq isine rızashylyǵyn bildirdi.