Qazaqstannyń týrısterdi tirkeý júıesine ózge elder qyzyǵýshylyq tanytýda– mınıstr

ASTANA. QazAqparat – Bıyl elimizde qazaqstandyq demalýshylar sany rekordtyq kórsetkishke jetýi múmkin. Bul týraly QR Mádenıet jáne sport mınıstri Dáýren Abaev aıtty, dep habarlaıdy QazAqparat tilshisi.

«2021 jyly otandyq demalýshylar sany 6,9 mln jetti. Bıyl boljam boıynsha bul kórsetkish 8 mıllıon týrıstke deıin ósýi kerek. Bul – rekordtyq kórsetkish. Qonaq úıler men basqa da ornalastyrý oryndary 68 mlrd teńgege qyzmet kórsetse, bul ótken jylmen salystyrǵanda 52 paıyzǵa joǵary. Sheteldik týrısterge kelsek, jyl basynan beri elimizge 3,1 mln adam kelgen. Bul ótken jyldyń sáıkes kezeńimen salystyrǵanda 3 ese kóp. Osylardyń bári bizdiń rekordtarymyzdy kórsetedi», - dedi Mádenıet mınıstri Májilistiń búgingi otyrysynda.

Onyń aıtýynsha, búginde elimizde 28 elge 111 baǵyt boıynsha 489 reıs bar.

«Bul jumys jalǵasyp jatyr, óziniń protsedýralary bar, elimiz «ashyq aspan» saıasatyn qabyldady, biz daıynbyz. Biraq basqa elderdiń áýe kompanııalarymen jumys isteý kerek. Sáýirden bastap qurlyqtaǵy shekaralar ashyldy. 2022 jyldyń maýsym aıynan bastap Qazaqstan shekaralyq vaktsınalaý tólqujattary men PTR sertıfıkattaryn alyp tastady. 78 elmen vızasyz rejım qalpyna keltirildi. Qazir ondaı elder sany 100-ge deıin jetkizý máselesi pysyqtalýda», - dedi D. Abaev.

Sonymen birge mınıstr týrısterdi esepke alýǵa arnalǵan «eQonaq» tsıfrlyq júıesi týraly aıtyp berdi.

«Júıe qazir belsendi jumys istep jatyr. Ol kóshi-qon organdaryna naqty aqparatty beredi. Buryn týrıster kelip, polıtsııanyń kóshi-qon qyzmetine baryp tirkeletin. Qazir onlaın avtomatty túrde tirkeletin múmkindik bar. Bul tájirıbege Ázerbaıjan, Grýzııa men Ózbekstandaǵy áriptesterimiz qyzyǵýshylyq tanytyp otyr», - dedi D. Abaev.