Qazaqstannyń turǵyn úı naryǵyndaǵy shynaıy ahýal qandaı - sarapshy pikiri
NUR-SULTAN. QazAqparat - Qazaqstannyń turǵyn úı naryǵyndaǵy ahýal jaqsaryp kele jatyr. Mundaı pikirdi Qazaqstan Rıeltorlarynyń birikken qaýymdastyǵy prezıdentiniń keńesshisi Nına Lýkıanenko bildirdi, dep habarlaıdy QazAqparat tilshisi.
«Uzaq ýaqytqa sozylǵan oqshaýlaný rejımi men jyljymaıtyn múlikpen mámile jasaý múmkindiginiń bolmaýy saldarynan elimizde sáýir aıynda ne bári 5 211 mámile ǵana jasaldy. Bul rekordtyq eń tómengi kórsetkish. Degenmen, qazirgi ýaqytta notarıaldy rásimdeýdi, mámilelerdi tirkeýdi qosa alǵanda barlyq saladaǵy qyzmet is júzinde qalpyna keldi desek te bolady jáne mamyrda 17 210 mámile jasaldy. Bul san aı saıynǵy standartty mámilelerge qaraǵanda birshama tómen. Biraq, bul mamyr aıynyń alǵashqy on kúninde barlyǵy úıinde bolýyna baılanysty bolǵan jaıt», - dedi Nına Lýkıanenko.
Onyń atap ótýinshe, resmı statıstıkalyq málimetterge qaraǵanda, baspananyń bir sharshy metrine baǵanyń azdap qymbattaǵany baıqalady.
«Ósim 1 paıyzdy qurap otyr. Munyń eshqandaı ereksheligi joq. Bul ınvestıtsııalyq sebepterge baılanysty mámilelerdiń uzaq ýaqyt keıinge shegerilýimen baılanysty. Sonymen qatar, jańa úı salý barysynda qoldanylatyn materıaldardyń 24-60 paıyzy ımporttalatyndyǵyn da qaperge alý qajet. Onyń ústine dollar baǵamy ósti. Al ımporttalatyn materıaldar dollarmen alynatyndyqtan qurylys shyǵyndary da arta túsedi. Bul da baǵaǵa áserin tıgizedi», - dedi sarapshy.
Sonymen qatar ol turǵyn úı naryǵyndaǵy jaǵdaıdyń ózgeretindigin atap óte kele, baǵanyń kúrt quldyraýy ne ósýi bolmaıtynyn basa aıtty.
