Qazaqstannyń turǵyn úı naryǵynda úleskerlerge kepildik beretin qor qurylady
ASTANA. QazAqparat - Qazaqstannyń turǵyn úı naryǵynda úleskerlerge kepildik beretin qor qurylady. Bul týraly búgin Májiliste QR Ulttyq ekonomıka mınıstri Erbolat Dosaev málim etti. Jıyn barysynda «Turǵyn úı qurylysyna úlestik qatysý týraly» zań jobasy talqylanǵan bolatyn.
Mınıstrdiń aıtýynsha, zań jobasymen turǵyn úı qurylysy salasynda retteýdiń tyń tásilderi usynylady. Atap aıtqanda, úlestik salymdardy kepildendirý, ekinshi deńgeıli bankterdiń jobany qarjylandyrýy, turǵyn úı ǵımaraty qańqasyn qurylys salýshynyń jeke qarajaty esebinen turǵyzý qarastyrylady. «Osyǵan oraı, Qazaqstanda úlestik salymdardy kelipdendirý júıesin qurý úshin «Qazaqstannyń ıpotekalyq nesıelerge kepildik berý qory» AQ Qory negizinde Kepildendirý qoryn qurý usynylady. Bundaı ýákiletti kompanııa turǵyn úı ǵımaratynyń qurylysy boıynsha óz mindettemelerin oryndamaǵan jaǵdaıda, jarǵylyq mindetterge sáıkes Qor turǵyn úı qurylysy aıaqtalǵannan keıin úleskerlerge kepildikterdi usynady», - dedi Erbolat Dosaev. Onyń aıtýynsha, qurylys salýshylarǵa talaptar da belgilenedi. Máselen, ondaı turǵyn úı ǵımarattaryn salatyn qurylys salýshylardyń tájirıbesi keminde úsh jyl bolýy shart, sońǵy eki jylda zalalsyz qyzmet atqarǵan bolýy kerek. Sonymen qatar qurylys kompanııasynyń qaryz jáne menshik kapıtalynyń ara qatynasy jetiden aspaýy kerek. «Al jańadan qurylatyn Qor úlestik qurylysqa qatysýshylarǵa qarjylyq turaqtylyq, tájirıbesiniń bolýy boıynsha biliktilik talaptaryn qoıady. Sosyn ol ınjınırıngtik kompanııalar arqyly úleskerlerdiń aqshasyn maqsatty paıdalanylýyna baqylaý tetikterin engizedi. Eń úzdik táýekel menedjmentiniń tájirıbesin paıdalanatyn bolady», - dedi Ulttyq ekonomıka mınıstri.
