Qazaqstannyń turǵyn úı naryǵynda baǵalar tómendedi - Statıstıka
ASTANA. QazAqparat - 2016 jyldyń naýryz aıynda elimizdiń turǵyn úı naryǵynda baǵalardyń tómendeýi baıqaldy. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmeti habarlady.
Málimetterge qaraǵanda, naýryz aıynda ótken aımen salystyrǵanda jańa turǵyn úılerdi satý baǵalary 2,5 paıyzǵa, abattandyrylǵan turǵyn úılerdi alyp satý - 0,6 paıyzǵa, odan tómengi sanattaǵy turǵyn úıler baǵasy - 0,1 paıyzǵa tómendedi. Al abattandyrylǵan turǵyn úıdi jalǵa alý tólemi 0,3 paıyzǵa arzandaǵan.
Atap aıtqanda, 2016 jyldyń naýryz aıynda jańa turǵyn úılerdiń sharshy metriniń baǵasy 253 myń 530 teńgeni qurap otyr. Bul aqpan aıymen salystyrǵanda 2,5 paıyzǵa tómen. Abattandyrylǵan turǵyn úılerdiń ortasha baǵasy sharshy metrine 194 myń 808 teńgeni, al odan tómen sanattaǵy turǵyn úılerdiń sharshy metri 115 myń 658 teńgeni qurady.
Sonymen qatar, abattandyrylǵan turǵyn úılerdi jalǵa berý tólemi sharshy metrine 1 myń 298 teńge boldy.
