«Qazaqstannyń turǵyn úı qurylys jınaq banki» nesıe berý talaptaryna ózgertýler engizdi
ALMATY. 19 qarasha. QazAqparat /Erbol Azanbek/ - «Qazaqstannyń turǵyn úı qurylys jınaq banki» AQ 1 qarashadan bastap nesıe berý talaptaryn ózgertti.
Bul týraly banktiń baspasóz qyzmeti habarlady.
Ózgeristerge sáıkes budan bylaı jylyna 12 paıyz mólsherlememen aldyn ala zaemdar alýǵa múmkindik týdy. Tutynýshylar turǵyn úı jaǵdaılaryn jaqsartý úshin aldyn ala jınaqtaýsyz jylyna 12 paıyzben turǵyn úı zaemdaryn ala alady, osyǵan oraı aı saıynǵy tólem ortasha alǵanda 10 paıyzǵa tómendetilgen.
Sondaı-aq «Jeńil» aralyq nesıe berý baǵdarlamasy qaıta jandandyrylǵan. Bul boıynsha turǵyn úı jaǵdaılaryn jaqsartýǵa qajet somanyń 50 paıyzy qolynda bar nemese kórsetilgen somany óziniń jınaq shotynda merziminen buryn jınaǵan tutynýshylar jylyna 11 paıyzben «Jeńil» nesıe berý baǵdarlamasy boıynsha aralyq turǵyn úı zaemyn paıdalana alady. «Jeńil» baǵdarlamasynyń utymdylyǵy - negizgi qaryz ótemin 3 jyldan artyq emes merzimge keıinge qaldyrý.
QazAqparat anyqtamasy: «Qazaqstannyń turǵyn úı qurylys jınaq banki» AQ elimizdegi turǵyn úı qurylys jınaq júıesiniń negizinde jumys isteıtin birden-bir qarjy ınstıtýty bolyp tabylady. 2009 jylǵy 27 shildeden bastap «Samuryq-Qazyna» UÁQ» AQ kompanııalarynyń tobyna kiredi.
