«Qazaqstannyń turǵyn úı qurylys jınaq banki» 9 aıda 41 123 turǵyn úı qurylys jınaq sharttaryn jasady
ASTANA. 3 qarasha. QazAqparat /Marlan Jıembaı/ - «Qazaqstannyń turǵyn úı qurylys jınaq banki» AQ aǵymdaǵy jyldyń 9 aıy ishinde jalpy sharttyq somasy 86 mlrd. teńgege 41 123 turǵyn úı qurylys jınaq sharttaryn jasady.
Bul týraly búgin elordada ótken baspasóz máslıhaty barysynda atalǵan bank basqarma tóraǵasynyń orynbasary Máýlen Óteǵulov málim etti.
«Eger ótken jyldyń tıisti kezeńimen salystyratyn bolsaq, jasalǵan sharttar sany 22,2 paıyzǵa, shartty soma 15,1 paıyzǵa kóbeıdi», - dedi ol.
Onyń atap ótýinshe, bank jumys isteı bastaǵannan beri jasalǵan turǵyn úı qurylys jınaq sharttarynyń sany 198 371-ge deıin ósip, al olar boıynsha jalpy sharttyq soma 331,6 mlrd. teńgeni qurady. Bank qyzmetiniń búkil kezeńi ishinde jalpy somasy 72,4 mlrd. teńgege barlyǵy 23 626 zaem, sonyń ishinde 2010 jyly 17,5 mlrd. teńge somasyna 5 741 zaem berilgen.
