Qazaqstannyń turaqtylyǵy Nazarbaevtyń kóshbasshylyǵymen baılanysty – Tonı Bler

NUR-SULTAN. QazAqparat - 1990 jyldardyń basynda, Keńes Odaǵy ydyraǵan kezde Qazaqstannyń qazirgideı el bola alatynyna sengen adamdar óte az boldy. Ulybrıtanııanyń eks-premer-mınıstri Tonı Blerdiń aıtýynsha, eldiń tabysy men turaqtylyǵy Nursultan Nazarbaevtyń kóshbasshylyǵyna baılanysty, dep habarlaıdy QazAqparat.

«Alda bolatyn syn-qaterler men reformalarǵa qaramastan, Qazaqstan bolashaqqa senimmen qaraı alady. Prezıdent Nazarbaev álem túsinýi tıis úsh mańyzdy nárseni jasady. Birinshiden, ol ıadrolyq qarýdan bas tartty, sonyń arqasynda Qazaqstan óziniń ıadrolyq arsenalyn joıǵan jalǵyz memleket atandy. Ekinshiden, Qazaqstan musylman halqy basym el retinde dinı toleranttylyqtyń shamshyraǵy bolyp tabylady. Qazaqstanda din men mádenıettegi aıyrmashylyqtarǵa qaramastan hrıstıan jáne evreı qaýymdarymen jaqsy qarym-qatynas ornatylǵan. Úshinshiden, Qazaqstan eki jahandyq alyp - Qytaı men Reseıdiń arasynda ornalasqanyna qaramastan, Batystyń adal jáne senimdi odaqtasy bolyp qala berdi, buǵan men 11 qyrkúıektegi oqıǵalardan keıin kóz jetkizdim», - dedi spıker óz baqylaýlarymen bólise otyryp.

Ol sondaı-aq turaqty jańǵyrtý protsesinde el ekonomıkasy birneshe ese óskenin atap ótti. Bul aıtýly jetistikter.

«Eger aımaqqa jáne sońǵy 30 jylda basqa elder tap bolǵan barlyq qıyndyqtarǵa kóz júgirtetin bolsaq, Qazaqstan óziniń salǵan jolyn jáne aldaǵy ýaqytta nyq senimmen qadam basar jolyn maqtan ete alady dep oılaımyn. Osynyń bárine qoljetkizý úshin úlgili kóshbasshylyq qajet boldy, sondyqtan oǵan óz qurmetimdi bildirý men úshin úlken mártebe», - dedi saıasatker.