Qazaqstannyń Turaqty ókili DSU bas dırektoryna senim gramotalaryn tapsyrdy

JENEVA. QazAqparat – Dúnıejúzilik saýda uıymy (DSU) jáne halyqaralyq ekonomıkalyq uıymdar janyndaǵy Qazaqstan Respýblıkasynyń Turaqty ókili Janar Aıtjan DSU bas dırektory Ngozı Okondjo-Ivealaǵa senim gramotalaryn tabys etti, dep habarlaıdy QazAqparat.

QR Syrtqy ister mınıstrliginiń málimetinshe, kezdesý barysynda N. Okondjo-Iveala Qazaqstan Prezıdenti Qasym-Jomart Toqaevqa DSU janynan Qazaqstannyń Turaqty ókildigin ashý týraly sheshim qabyldaǵany úshin alǵys bildirdi. Bas dırektordyń pikirinshe, bul elimizdiń 2022 jylǵy maýsymda Qazaqstannyń tóraǵalyǵymen sátti aıaqtalǵan DSU-nyń 12-shi mınıstrlik konferentsııasy barysynda qol jetkizilgen ýaǵdalastyqtar ımplementatsııasyna eleýli úles qosýǵa yqpal etedi.

Óz kezeginde Qazaqstannyń Turaqty ókili 2015 jyly DSU-ǵa kirgen sátten bastap, Qazaqstan kópjaqty saýda júıesin belsendi túrde qoldaıtynyn atap ótti. Buǵan deıin Qazaqstan DSU-nyń Saýda jáne qorshaǵan orta jónindegi komıtetiniń jumysyna tóraǵalyq etken, 2018 jyldan bastap elimiz DSU-nyń Qyzmetter saýdasy jónindegi arnaıy sessııasyn basqaryp keledi. Qazaqstannyń, sondaı-aq Ortalyq Azııa elderiniń Uıymǵa kirýine járdem kórsetetini jáne teńizge shyǵa almaıtyn damýshy elderdiń múddelerin bildiretini atap ótildi.

Foto : gov.kz