Qazaqstannyń Tuńǵysh Prezıdenti - Elbasy birqatar kezdesýler ótkizdi
Nursultan Nazarbaev Reseı Federatsııasynyń Prezıdenti Vladımır Pýtınmen kezdesti. Elbasy kezdesý barysynda Vladımır Pýtınge «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordenin tapsyrdy.
Qazaqstannyń Tuńǵysh Prezıdenti Eýrazııalyq ekonomıkalyq odaqtyń qazirgi nátıjeleri men ári qaraıǵy damý perspektıvalaryn atap ótti.
«Bes jyl buryn, Siz jáne Aleksandr Lýkashenko úsheýmiz osy odaqty qurdyq. Biz júzege asyrǵan bul ıdeıa meniń tarapymnan 25 jyl buryn MMÝ qabyrǵasynda usynylǵan bolatyn. Qıyn ýaqyttarǵa qaramastan, aramyzdaǵy ózara saýda ósip keledi. Birlesken kásiporyndardyń sany artýda. Eýrazııalyq ekonomıkalyq odaq EO, ShYU, ASEAN jáne basqa da uıymdarmen ıntegratsııa jolymen júrýi tıis dep esepteımin. Bizge osy jóninde jumys isteý kerek», - dedi Nursultan Nazarbaev.
Vladımır Pýtın ózine tapsyrylǵan marapat úshin Elbasyna alǵys aıtty jáne jan-jaqty dıalogtyń ári qaraı nyǵaıa beretinine senim bildirdi.
«Sizge marapatyńyz úshin jáne ıntegratsııa isinde, eki jaqty qarym-qatynastarda, Reseı men Qazaqstannyń ózara strategııalyq is-qımylyn damytýda atqarylǵan jumystar úshin alǵys aıtqym keledi. Bul rette Sizdiń zor eńbegińiz bar», - dedi Reseı Prezıdenti.
Qazaqstannyń Tuńǵysh Prezıdenti Belarýs Respýblıkasynyń Prezıdenti Aleksandr Lýkashenkomen kezdesý barysynda Elbasy qurmetti qonaqqa «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordenin tabys etti.
Nursultan Nazarbaev Aleksandr Lýkashenkonyń ıntegratsııalyq úderisterdi damytý jáne Eýrazııalyq ekonomıkalyq odaqty qurý isine sińirgen eńbegin erekshe atap ótti.
«Bıyl Eýrazııalyq ekonomıkalyq odaqtyń osy jerde qurylǵanyna 5 jyl jáne ózim usynǵan eýrazııalyq ıntegratsııa ıdeıasynyń jarııa etilgenine 25 jyl tolyp otyr. Siz qoldaý kórsetpegende bul uıym qurylmas edi», - dedi Nursultan Nazarbaev.
Elbasy Nursultan Nazarbaev Belarýs halqyna jáne onyń kóshbasshysy A. Lýkashenkoǵa árdaıym qoldaý kórsetýge daıyn ekenin aıtty.
«Sizge kez kelgen másele boıynsha qoldaý kórsetýge árdaıym daıynmyn. Siz Belarýs Respýblıkasyn joǵary deńgeıde damytyp kelesiz. Sizdi Qazaqstannyń kórikti jerlerin tamashalaýǵa shaqyramyn», - dedi Qazaqstannyń Tuńǵysh Prezıdenti.
Aleksandr Lýkashenko qonaqjaılyq kórsetip, marapat tapsyrǵany úshin Nursultan Nazarbaevqa rızashylyq bildirdi.
«Belarýs halqyna qurmet kórsetkenińiz úshin rahmet. Bul maǵan ǵana kórsetilgen qurmet emes. Bul - meniń halqyma degen ystyq yqylasyńyz ben qurmetińiz. Qazaqstannyń Prezıdenti - laıyqty azamat. Siz dana sheshim qabyldadyńyz. Qazaqstandyqtar basqa halyqtar sııaqty turaqtylyqty baǵalaıtynyna senimdimin. Eń bastysy - eńbek. Eńbek etseń, nátıje de bolady», - dedi Belarýs Respýblıkasynyń Prezıdenti.
Sonymen qatar, Elbasy Qyrǵyz Respýblıkasynyń Prezıdenti Sooronbaı Jeenbekovpen kezdesti.
Kezdesý barysynda Nursultan Nazarbaev Sooronbaı Jeenbekovke «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordenin tabys etti.
Qazaqstannyń Tuńǵysh Prezıdenti baýyrlas eki halyq arasyndaǵy qatynastardyń joǵary deńgeıde ekenin atap ótti.
«Biz - bir-birimizge jaqyn, baýyrlas halyqpyz. Men Sizdiń elińizdi jaqsy bilemin. Qazaqstannyń aldaǵy ýaqytta da Sizdi qoldaıtynyna senimdimin», - dedi Elbasy.
Sooronbaı Jeenbekov joǵary marapat tapsyrǵany úshin Nursultan Nazarbaevqa alǵys aıtyp, Elbasynyń Ortalyq Azııa halyqtarynyń dostyǵyn nyǵaıtý isindegi erekshe rólin atap ótti.
«Siz Túrki áleminiń kóshbasshysy sanalasyz. Siz Ortalyq Azııa elderiniń dostyǵyn nyǵaıtý isine zor úles qostyńyz. Qazaq halqynyń Tuńǵysh Prezıdentinen orden alý men úshin zor mártebe. Sizge shynaıy rızashylyǵymdy bildiremin», - dedi Qyrǵyz Respýblıkasynyń Prezıdenti.
Budan ózge, Nursultan Nazarbaev Tájikstan Respýblıkasynyń Prezıdenti Emomalı Rahmonmen kezdesti. Kezdesý barysynda Elbasy yntymaqtastyqtyń alǵashqy kúnderinen bastap Qazaqstan men Tájikstannyń berik dostyqqa jáne senimge negizdelgen qatynastar ornatqanyn atap ótti.
«Dostyǵymyz jyldan jylǵa nyǵaıyp keledi. Siz álemdegi kúrdeli jaǵdaıda Tájikstandy basqaryp otyrsyz. Elderińiz dáıekti damyp, turaqtylyq qamtamasyz etilýde», - dedi Nursultan Nazarbaev.
Qazaqstannyń Tuńǵysh Prezıdenti eki jaqty qatynastar baýyrlas halyqtardyń ıgiligi úshin aldaǵy ýaqytta da nyǵaıa beretinin aıtty. 
Emomalı Rahmon Nursultan Nazarbaevtyń basshylyǵymen Qazaqstannyń qarqyndy damyǵanyn atap ótti.
«Men Qazaqstannyń kóz aldymyzda qalaı ózgergenin kórdim. Elordada ótken alǵashqy kezdesýler meniń esimde jáne onyń qanshalyqty ózgergenin kórip otyrmyn. Oń ózgerister qalada ǵana emes, búkil elińizde júrip jatyr. Bul - Sizdiń tabysty jumysyńyzdyń, dana jáne kóregen saıasatyńyzdyń nátıjesi», - dedi Tájikstannyń Prezıdenti.
Sondaı-aq, Qazaqstannyń Tuńǵysh Prezıdenti Eýrazııalyq ekonomıkalyq komıssııa alqasynyń tóraǵasy Tıgran Sarkısıanmen kezdesti. Kezdesý barysynda taraptar Eýrazııalyq ekonomıkalyq odaqtyń qazirgi jaǵdaıy men damý perspektıvalaryn talqylady.
Nursultan Nazarbaev kóptegen memleketter men uıymdardyń Eýrazııalyq ekonomıkalyq odaqpen qarym-qatynas ornatýǵa nıetti ekenin jáne odaqtyń ekonomıkalyq seriktesteriniń aıasyn keńeıtý qajettigin atap ótti.
«Erteń osy jerde Joǵary Eýrazııalyq ekonomıkalyq keńestiń mereıtoılyq otyrysy ótedi. Siz odaqtyń atqarýshy organyna tóraǵalyq etip, júktelgen mindetterdi tabysty atqaryp kelesiz. Alǵa jyljı berýimiz kerek», - dedi Qazaqstannyń Tuńǵysh Prezıdenti.
Tıgran Sarkısıan ekonomıkalyq odaqty damytý isindegi jetistikterge toqtaldy.
«Integratsııany jáne Ózińiz 25 jyl buryn usynǵan ıdeıany tájirıbe júzinde júzege asyrý máselelerin talqylaýǵa múmkindik bergenińiz úshin rızashylyǵymdy bildiremin. Mine, 5 jyl boıy osy jobany iske asyryp kelemiz. Ózińiz shırek ǵasyr buryn kóregendik tanytyp, bul bastama elderimiz úshin asa qajet boldy», - dedi Eýrazııalyq ekonomıkalyq komıssııa alqasynyń tóraǵasy.
Buǵan qosa, Elbasy Armenııa Respýblıkasynyń Premer-Mınıstri Nıkol Pashınıanmen kezdesti. Nursultan Nazarbaev mártebeli meımanǵa qoshemet bildirip, eki jaqty saýda-ekonomıkalyq qatynastardy damytýdyń jáne nyǵaıtýdyń mańyzdylyǵyn atap ótti.
«Qazaqstan men Armenııa arasynda árdaıym jaqsy qarym-qatynas boldy. Qazaqstandaǵy armıan dıasporasy elderimizdiń qarym-qatynasyna dáneker bolyp otyr», - dedi Elbasy.
Nıkol Pashınıan Qazaqstannyń Tuńǵysh Prezıdentiniń memleketaralyq baılanystardy jáne qurlyqtaǵy ıntegratsııalyq úderisterdi damytý isine erekshe úles qosqanyn atap ótti.
Armenııanyń Premer-Mınıstri eki jaqty ekonomıkalyq yntymaqtastyqtyń odan ári nyǵaıa túsetinine senim bildirdi.
«Ekonomıka salasynda jumys isteýge múmkindigimiz bar dep oılaımyn. Eń bastysy, eki el úkimetterinde qarym-qatynasymyzdy damytýǵa degen saıası erik-jiger bar. Bizdiń halyqtarymyz tarıhı turǵydan ózara baılanysqan», - dedi N. Pashınıan.