«Qazaqstannyń tumsa tabıǵaty» fotobaıqaýynyń jeńimpazdary anyqtaldy

ALMATY. QazAqparat - Almatyda Іle-Alataý ulttyq parkiniń vızıt-ortalyǵynda «Qazaqstannyń tumsa tabıǵaty» birinshi respýblıkalyq fotobaıqaýy qorytyndylanyp, jeńimpazdardyń esimi jarııalandy, dep habarlaıdy QazAqparat tilshisi.

QR Ekologııa, geologııa jáne tabıǵı resýrstar mınıstrligi «National Geographic Qazaqstan» jýrnaly redaktsııasymen birge uıymdastyrǵan baıqaý el Táýelsizdiginiń 30 jyldyǵyna arnalǵan. Dodanyń basty maqsaty - adam men tabıǵattyń ózara árekettesý máselelerine qoǵam nazaryn aýdarý, tabıǵı alýantúrlilikti saqtaý jáne qorshaǵan ortaǵa degen qurmet ıdeıasyn keńinen nasıhattaý.

Uıymdastyrýshylardyń atap ótýinshe, qoǵamdaǵy janýarlarǵa degen qatygezdiktiń aldyn alý men janashyrlyq, ósimdikter álemine uqypty qaraý ıdeıalaryn óner týyndylary arqyly da keńinen taratý qajet.

«Baıqaýǵa arnalǵan saıtqa 782 adam tirkelip, 1 515 sýret saıysqa tústi. Fotobaıqaýǵa túsken sýretterdiń basym kópshiligi kompozıtsııalyq turǵydan ádemi bolǵandyqtan qazylar alqasynyń aldynda úlken jaýapkershilik pen qıyn tańdaý turdy. Jalpy, ekologııalyq aǵartýshylyq, ekologııalyq sanany kóterý jumysynyń bir bóligi retinde osy baıqaýdy Táýelsizdiktiń 30 jyldyǵy merekesine arnap mınıstrliktiń qoldaýymen birinshi ret uıymdastyryp otyrmyz. Aımaqtardaǵy ekologııa, janýarlar álemi problemalaryn osyndaı fotosýretter arqyly kórsetýdi maqsat tuttyq»,- deıdi «National Geographic Qazaqstan» jýrnalynyń bas redaktory Erkin Jaqypov.

Sonymen úsh kezeńnen turǵan baǵalaýdan keıin qazylar alqasy 4 atalym boıynsha jeńimpazdardy anyqtady:

1. Makroálem – Aleksandr Vlasıýk, «Melolontha»;

2. Anasy men balasy – Farhat Kabdykaırov, «Bábisek balapanyn tamaqtandyrý»;

3. Qazaqstan peızajdary – Ernur Manaphan, «HAN TÁŃІRІ»;

4. Qazaqstan jan-janýary – Pavel Mıheev, «Sopernık».

Al «Týranga Grýpp» kompanııasy atynan «Aıýsaı» atalymyn «Egemen Qazaqstan» respýblıkalyq gazetiniń fototilshisi Erlan Omar ıelendi.