Qazaqstannyń túkpir-túkpirinen kelgen qyzdar Qyz Jibek róliniń kastınginde baqtaryn synaýda
ASTANA. QazAqparat - Tuńǵysh ulttyq «Qyz Jibek» operasy jańa formatta usynylmaqshy. Operany qoıýǵa Las-Vegasta keremet shoýdan bastap álemniń jetekshi teatrlarynda qoıylymdarǵa deıin qoıatyn, barlyq janr men baǵytta jumys jasaıtyn aty álemge áıgili, búgingi kúni joǵary suranysqa ıe rejısser Franko Dragone shaqyrtyldy.
Teatrdyń maqsaty - ulttyq mýzykalyq klassıkanyń jaýharyn teatr ónerindegi ozyq jetistikter men búginginiń zamanaýı jetkizý joldary arqyly kórsetý. Jańa pishimdegi «Qyz Jibek» operasynda ulttyq mádenı dástúrimiz eskerilip, týyndyny álemdik teatr tilinde sóıletý arqyly dúnıe júzi elderine usynýǵa múmkindik týady.
Bul týraly «Astana-Opera» teatrynyń baspasóz qyzmeti habarlady.
Mundaı jobalarǵa ashyq kastıng jarııalaý qalypty jaǵdaı. Osylaısha «Astana Opera» teatry Evgenıı Brýsılovskııdiń «Qyz Jibek» operasyndaǵy basty partııa -Jibekti oryndaıtyn adamdy izdeýdi jalǵastyrady.
30-31 qańtar aralyǵynda ótken konkýrstyq irikteýdiń birinshi kezeńinde Astana, Almaty, Aqtóbe, Qaraǵandy, Qyzylorda, Oral, Óskemen, Pavlodar jáne basqa qalalardan kelgen 22 úmitker qatysty. Kandıdattarǵa mynandaı talaptar qoıyldy: ádemi daýys, ásem kelbet, 18 ben 32 jas aralyǵynda, mindetti túrde qazaq tilin biletin, sahnaǵa ıkemdelgen jáne akterlyq tájirıbesi, sonymen qatar mýzykalyq bilimi bolýy kerek. «Roldiń ózindik ereksheligin eskere otyryp, biz jas ári talantty oryndaýshyny izdeımiz», - deıdi operalyq trýppanyń kórkemdik jetekshisi, Tatarstan Respýblıkasynyń eńbek sińirgen óner qaıratkeri Gıýzel Haıbýlına.
Konkýrstyń sheshýshi kezeńi asa kórnekti qoıýshy rejısser Franko Dragoneniń qatysýymen aǵymdaǵy jyldyń mamyr aıynda ótedi. «Astana Opera» teatrynyń kórkemdik keńesi oǵan qatysatyn úsh úmitkerdi iriktedi, olar: Saltanat Baıjumanova, Qarlyǵash Ermekova, Saltanat Ahmetova.
«Astana Opera» MOBT dırektory Tólegen Muhamedjanov konkýrsqa qatysqandarǵa alǵys bildirip, operalyq jáne kontserttik sahnada úlken jetistikterge jetýlerine tilektestik bildirdi.
