Qazaqstannyń tuǵyrdan sekirýshiler bizdiń deńgeıimizge jetip qaldy- Japonııa quramasynyń jattyqtyrýshysy K. Sýda
ALMATY. 2 aqpan. QazAqparat /Názıra Eleýhan/ - "Biz búgin shańǵymen tuǵyrdan sekirýshi sportshylardyń ónerlerine tánti boldyq. Men komandalardyń jaqsy óner kórsetkenine qýanyshtymyn. Búgin shynymen de naǵyz báseke boldy", -dedi búgin Almatyda shańǵymen tuǵyrdan sekirý jarysynyń ekinshi kúniniń qorytyndysyna arnalǵan baspasóz máslıhatynda QR Ulttyq Olımpıada komıtetiniń vıtse-prezıdenti Pavel Novıkov.
Onyń pikirinshe, qazaqstandyq sekirýshiler jarys aldyndaǵy tolqýlaryn jeńe alyp, japondyqtarǵa laıyqty básekeles ekendikterin kórsete aldy. «Búginde bizdiń sekirýshilerdi halyq jaqsy biledi. Az ýaqyttyń ishinde bul sport túri elimizde tanymal bola bastady. Ony búgin tramplın keshenine kóp jınalǵan jankúıerler sanynan-aq baıqaýǵa bolady. Bizdi búgin ásirese, trıbýna halyqqa toly bolǵandyǵy qatty qýantty»,-dedi ol.
Pavel Novıkov sonymen qatar keshe Shańǵymen tuǵyrdan sekiretin halyqaralyq keshende mańyzdy synaq bolǵandyǵyn aıtty. «Keshendi Jak Roggeniń ózi qarap, aralap shyqty. Ol keshenniń deńgeıine óte joǵary baǵa berip, Qazaqstan keremet sporttyq nysandarǵa ıe el, endi munda barlyq deńgeıdegi halyqaralyq jarystardy ótkizýge bolady dep atap ótti. Bul oraıda osy keshende bıylǵy jyldyń 30 tamyzynda shańǵymen tuǵyrdan sekirýden Álem kýbogy kezeńi ótetinin habarlaǵym keledi», -dedi Pavel Novıkov.
Qazaqstan quramasynyń jattyqtyrýshysy Qaırat Bekenovtyń aıtýynsha, bizdiń sportshylar áldemdegi eń myqty Japonııa komandasymen laıyqty básekege tústi. «Barlyq tuǵyrdan sekirister jaqsy oryndaldy, árıne azdaǵan tehnıkalyq qatelikter boldy. Degenmen, men shákirtterimniń ónerine rızamyn»,-dedi ol.
Máslıhatta Japonııa quramasynyń jattyqtyrýshysy Kendjý Sýda qazaqstandyq sportshylarǵa laıyqty óner kórsetkenderi úshin alǵysyn bildirip: «Básekedegi tartys jarystyń deńgeıine saı boldy. Qazaqstan quramasy kóz aldymyzda ósip jatyr. Osydan bes jyl buryn sizderdiń sekirýshilerińiz myqty bolmap edi. Qazir bizdiń deńgeıimizge jetip qaldy, «ókshemizdi basýda» desem bolady»,-dep atap ótti. Ol sonymen qatar: «Biz búgin taǵy da bul nysannyń tehnıkalyq jaraqtandyrylýy halyqaralyq talaptarǵa jaýap beretindigine kózimiz jetti»,- dedi.
QR Shańǵymen tuǵyrdan sekirý federatsııasynyń prezıdenti Andreı Verveıkın aýa raıynyń ózgerýine baılanysty baǵdarlamaǵa ózgerister engizilgenin aıtty. «Ekinshiden, sportshylardyń qaýipsizdigi úshin 4 aqpan ótýi tıis bolǵan 125 metrlik sekirýden komandalyq jarys búginge aýystyryldy. Bul ózgeris tehnıkalyq dırektsııanyń sheshimimen búginge qoıyldy»,-dedi ol.
