Qazaqstannyń trıatlon federatsııasyna jańa prezıdent saılandy
NUR-SULTAN. QazAqparat – Nazarbaev Ýnıversıtetinde Qazaqstan trıatlon federatsııasynyń (QTF) jyl saıynǵy kongresi ótti. QazAqparat bul týraly QTF-ke silteme jasap habarlaıdy.
Kongress QTF prezıdenti Kárim Másimovtiń tóraǵalyǵymen ótti. Kongreske QR Mádenıet jáne sport mınıstri Aqtoty Raıymqulova, mádenıet jáne sport vıtse-mınıstri Eldos Ramazanov, QR Ulttyq Olımpıadalyq komıtetiniń bas hatshysy Sáken Musaıbekov, Sport jáne dene shynyqtyrý isteri komıteti tóraǵasynyń orynbasary Serik Jarasbaev, elorda ákimi Altaı Kólginov, baqylaýshy keńes tóraǵasy-ERG tobynyń bas atqarýshy dırektorynyń birinshi orynbasary Aldııar Qaztaev jáne taǵy basqalar qatysty.
Otyrys barysynda federatsııanyń jańa prezıdenti saılandy. Ókilettilik merziminiń aıaqtalýyna baılanysty Kongress músheleri jańa prezıdentti jáne birinshi vıtse-prezıdentti ashyq daýys berý jolymen saılady. Jıynǵa qatysýshylar Aldııar Qaztaevty biraýyzdan QTF-tiń jańa prezıdenti etip saılady. Al Kárim Másimov QTF Qurmetti prezıdenti bolyp saılandy. Ortalyqazııalyq trıatlon qaýymdastyǵynyń (SATA) prezıdenti jáne Almaty Triathlon Federation basshysy Ǵalymjan Esenov QTF birinshi vıtse-prezıdenti boldy.
Eske sala ketsek, K. Másimov QR trıatlon federatsııasynyń prezıdenti bolyp 2016 jyly saılanǵan edi. Onyń basshylyǵymen qazaqstandyq trıatlon josparly ári keshendi damý jolynan ótti. Dálirek aıtqanda, uıymnyń normatıvti-quqyqtyq bazasy jetildirildi, federatsııanyń jumysyn basqaratyn profıldi komıtetter quryldy, basty halyqaralyq trıatlon uıymdarymen (ITU, ASTC, Ironman (WTC)) jaqsy qarym-qatynas ornatyldy, el aımaqtarynda akkredıttelgen federatsııalar, olımpıadalyq rezervtegi balalar-jasóspirimder mektepterinde trıatlon bólimsheleri men sektsııalary ashyldy, Nur-Sultan, Almaty jáne Shymkent qalalarynda ITU, ASTC, Ironman birlesken aýqymdy halyqaralyq saıystar ótkizildi, elimizdiń barlyq derlik aımaqtarynda respýblıkalyq deńgeıdegi saıystar uıymdastyryldy, úlken halyqaralyq dodalarda ulttyq qurama músheleri jaqsy nátıjeler kórsetti, jáne de ádestemelik qujattar shyǵarylyp, bilikti bapkerler tárbıeleý isinde de birshama jetistikterge qol jetkizildi. Sonymen qatar, áýesqoılyq trıatlonnyń damýyna úlken serpilis bergen «TEMIRADAM» Kýbogi quryldy. K. Másimovtiń basshylyǵy kezindegi federatsııanyń basty jetistikteri retinde QTF ókilderiniń Azııalyq trıatlon konfederatsııasynyń (ASTC) Atqarýshy keńesine jáne profıldi komıtetterine daýys berý quqyǵymen saılanyp engendigin, Qyrǵyzstan, Ózbekstan, Iran, Aýǵanstan jáne Qazaqstan sekildi bes eldiń ulttyq federatsııalaryn biriktirgen Ortalyqazııalyq trıatlon qaýymdastyǵynyń (SATA) qurylýyn ataýǵa bolady.
«Búgingi tańda qazaqstandyq trıatlon óz damý jolynda úlken serpilis jasady. Federatsııa aıtarlyqtaı jetistikterge qol jetkizdi. Bul, birlese atqarǵan jumys pen dana basshylyqtyń arqasynda ekendigin senimdi túrde aıtýǵa bolady. Ulttyq federatsııanyń basqarý úlken abyroı ári jaýapkershilik. Bizdiń trıatlonǵa júıeli ári keshendi ósim qamtamasyz ete otyryp, qalyptasqan dástúrdi saqtaý kerek. Bul úshin barlyq kúshimdi jumsaýǵa nıettimin», - dedi Aldııar Qaztaev.
Budan basqa Kongreste federatsııanyń ótken jyly atqarǵan jumysy boıynsha esep tyńdalyp, kele jatqan olımpıadalyq maýsymǵa negizgi maqsattar qoıyldy.
