Qazaqstannyń trassalyq medıtsınalyq qutqarý beketteriniń parki jańa reanımobıldermen tolyqty
ASTANA. 8 jeltoqsan. QazAqparat - Búgin, Jedel medıtsınalyq járdem ǵylymı ortalyǵy bazasynda, QR Tótenshe jaǵdaılar mınıstri Vladımır Bojko men QR Densaýlyq saqtaý mınıstri Salıdat Qaıyrbekovanyń qatysýymen jańa medıtsınalyq qutqarý reanımobılderdiń kiltterin saltanatty túrde tabystaý rásimi ótti.
Bul týraly QR Densaýlyq saqtaý mınıstrliginiń baspasóz qyzmetinen habarlady.
Memleket basshysy N.Nazarbaevtyń «Bolashaqtyń irgesin birge qalaımyz!» atty Qazaqstan halqyna Joldaýynda atap kórsetilgen tapsyrmasyna, sondaı-aq «Qazaqstan Respýblıkasyndaǵy densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyna sáıkes QR Densaýlyq saqtaý mınıstrligi men QR Tótenshe jaǵdaılar mınıstrligine qurý júktelgen trassalyq medıtsınalyq qutqarý beketteri osyndaı reanımobıldermen jabdyqtalatyn bolady.
Mersedes-Benz Sprinter avtokóligi bazasynda jasalǵan reanımobılder arnaıy tapsyryspen Germanııanyń Lıngen qalasy zaýytynda shyǵarylǵan. Bul reanımobılder jıyntyǵy jaǵynan biregeı kólik dep aıtýǵa bolady.
Reanımobıl qýatty benzın qozǵaltqyshymen (260 a.k.) jabdyqtalǵan, bıik tóbesi bar tutas metal fýrgonnan turady, bul medıtsınalyq qyzmetkerlerge salon ishinde reanımatsııalyq sharalar ótkizý kezinde turyp kómek kórsetýge, uzartylǵan (8 metrge jýyq) bazasy 5-7 zardap shegýshini tasymaldaýǵa múmkindik beredi.
Reanımobılde apatty-qutqarý qural-saımandarynan turatyn jeke bólik bar. Olar zardap shegýshilerdi avtokólikten shyǵaryp alý jumystaryn jasaýǵa múmkindik beredi.
Sondaı-aq reanımobıl shuǵyl medıtsınalyq kómek kórsetýge qajetti zamanaýı medıtsınalyq jabdyqtarmen jáne medıtsınalyq quraldarmen jabdyqtalǵan. Barlyq reanımatsııalyq jabdyqtardy jetekshi eýropalyq óndirýshiler usyndy.
Reanımobılder medıtsınalyq jáne qutqarý jabdyǵynan bólek, uıaly baılanys operatorlary qyzmet kórsetý aıasynan tys bolǵan aýmaqpen baılanysýǵa múmkindik beretin spýtnıktik telefonmen jabdyqtalǵan.
Jalpy, qoǵamdyq densaýlyqty saqtaý máseleleri boıynsha sektoraralyq jáne vedomstvoralyq ózara árekettestik tıimdiligin arttyrý sheńberinde «Densaýlyq», «Járdem» jáne «Salamatty Qazaqstan» 3 poıyzy júrgizildi. 110 stansanyń turǵyndaryna 260 myńnan astam emdeý-dıagnostıkalyq qyzmeti kórsetildi. 48 myńnan astam adam, sonyń ishinde 14 myńǵa jýyq bala tekserildi.
Sanıtarlyq avıatsııa boıynsha Respýblıkalyq úılestirý ortalyǵy quryldy. 2011 jyldyń shilde aıynan beri 200-den astam ushý júzege asyryldy. 6 tikushaqty, sonyń ishinde 2 - Ka-32 A11VS jáne 4 - «Evrokopter ES-145» tikushaǵyn jetkizý jóninde kelisimder jasaldy.
Respýblıkada kólik medıtsınasyn damytý úshin óńirlerge 19 mobıldi jyljymaly kesheńder (MJK) satyp alynyp, jiberildi. 100 myńnan astam adam MJK arqyly medıtsınalyq tekserýden ótip, 115 myńnan astam zerthanalyq dıagnostıkalyq zertteýler jasaldy, mamandar 86 myńdaı keńes ótkizdi. Osylaısha, alysta ornalasqan óńirlerde turatyn halyqqa, ásirese aýyl turǵyndaryna kólik medıtsınasy arqyly qyzmet kórsetý qamtamasyz etilýde.
