Qazaqstannyń tórt shyǵarmashylyq ujymy ózara yntymaqtasa jumys isteıtin boldy
ASTANA. 20 naýryz. QazAqparat - Búgin elordada úsh oblystyń shyǵarmashylyq ujymdary jáne Astana qalasynyń fılarmonııasy ózara yntymaqtastyq týraly memorandýmǵa qol qoıdy.
Osy qujatqa sáıkes, tórt ujym bir-birine baryp, kontsert ótkizedi. Birqatar shyǵyndardy jáne ártisterdiń qalamaqysyn qabyldaýshy jaq tóleıtin bolady.
El tarıhynda bundaı memorandýmdy alǵash ret Astana qalasynyń Memlekettik fılarmonııasy, Qalı Baıjanov atyndaǵy Qaraǵandy kontsert birlestigi, Qostanaı oblysynyń Memlekettik fılarmonııasy jáne Isa Baızaqov atyndaǵy Pavlodar oblystyq fılarmonııasy rásimdep otyr. Negizgi maqsat Qazaqstan mádenıetiniń mýzykalyq murasy men dástúrlerin saqtap, otandyq ónerdi keńinen nasıhattaý. Ol úshin árbir shyǵarmashylyq ujym arnaıy kestege sáıkes, birneshe qalada kontsert qoıady. Jol júrý, tamaqtaný jáne turý aqysyn ózi tólese, qabyldaıtyn ujym kontserttik zaldy usynyp, bir aıdyń ishinde afıshalar men bıletterdi basyp shyǵarady. Sondaı-aq árbir kontsert úshin 300 myń teńge kóleminde qalamaqy tóleıdi. Al jyldyń sońynda gala-kontsert uıymdastyrylyp, onda úzdik tanylǵan ártisterge granttar tapsyrylatyn bolady.
«Buǵan deıin biz basqa qalada kontsert ótkizý úshin bir aı buryn óz ókilderimizdi jiberip, afıshalardy ilip júretinbiz. Endi osy memorandýmnyń arqasynda onyń barlyǵyn qabyldaıtyn jaq atqarady. Bul - óte tıimdi is. Sebebi ol ujym óz qalasynyń kórermenin jaqsy biledi. Búginde bul bastamaǵa úsh oblys qosylyp otyr. Aldaǵy ýaqytta ózge óńirler de qoldaıdy degen úmit bar», - deıdi Astana qalasy Memlekettik fılarmonııasynyń bas dırektory jáne kórkemdik jetekshisi Sáken Ábdirahmanov.
