Qazaqstannyń tórt oblysynda qutqarýshylar adamdardy qar qursaýynan shyǵarýda (FOTO)
ASTANA. QazAqparat - Qazirgi kezde Qazaqstannyń tórt aımaǵyndaǵy avtojoldarda shuǵyl qyzmet qutqarýshylary adamdar men avtotehnıkalardy qar qursaýynan shyǵarý jumystaryn júrgizýde.
Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov habarlady.
«Aqtóbe oblysynyń Qarǵaly jáne Hromtaý aýdandarynda aýa raıynyń nasharlaýyna baılanysty aýdandar ákimderiniń sheshimderimen jergilikti aýqymdaǵy tabıǵı sıpattaǵy tótenshe jaǵdaı jarııalandy. Kúrdeli meteorologııalyq jaǵdaı - burqasyn, kóktaıǵaq bolýyna baılanysty qazirgi kezde Aqtóbe oblysynda avtojoldardyń 8 ýchaskesi jabyldy, onyń ishinde tórteýi - respýblıkalyq mańǵyzdaǵy joldar.
Aqtóbe oblysynda ǵana joldardy tazartýǵa 500 birlikke tarta qardan tazartatyn tehnıka jumyldyryldy», - dedi R.Imanqulov.
Onyń aıtýynsha, sondaı-aq apattyq-qutqarý jumystary jáne adamdardy kóshirý Soltústik qazaqstan, Qostanaı, Qaraǵandy oblystarynda júrgizilýde.
Atalǵan oblystarda aldyn ala málimetter boıynsha qar qursaýynda barlyǵy 190 birlikke jýyq avtotehnıka qalǵan.
Eske sala keteıik, budan buryn Soltústik Qazaqstan oblysynyń úsh aýdanynda - Aıyrtaý, Jambyl, Shal aqyn aýdandarynda tótenshe jaǵdaı rejımi jarııalandy.
«Oblystarda tótenshe jaǵdaılar departamentteriniń daǵdarys ortalyqtarynda tótenshe jaǵdaılardy joıý jumystaryn úılestirý shtabtary jumys jasaıdy. Aqparattyq jáne psıhologııalyq qoldaý kórsetý maqsatynda psıhologııalyq qyzmetter iske qosylǵan. Tótenshe jaǵdaılardy joıý jumystary shuǵyl qyzmetter, bılik organdary arasyndaǵy tyǵyz ózara is-qımylda júrgizilýde», - dedi Rýslan Imanqulov. 
