Qazaqstannyń tóraǵalyǵy - EQYU damýynyń jańa satysy - respýblıkalyq basylymdarǵa sholý

***

«Sársenbiniń sáti, qańtardyń 13-inde Vena qalasyndaǵy tarıhı oryndardyń biri - Hofbýrg saraıynyń kontsert zalynda Qazaqstan Respýblıkasynyń Eýropadaǵy qaýipsizdik jáne yntymaqtastyq uıymyna tóraǵalyq etý jaýapty qyzmetine kirisý saltanatyna arnalǵan Qazaqstan óner sheberleriniń gala-kontserti boldy», dep jazady «Egemen Qazaqstan» gazeti. Kontsertti Avstrııada tirkelgen sheteldik elshilikterdiń basshylary men qyzmetkerleri, Avstrııanyń kórnekti tulǵalary, Eýropanyń birqatar elderinde turyp jatqan qazaq qandastarymyz, sondaı-aq Vena qalasynyń talǵampaz turǵyndary tamashalady. Merekelik aıtýly sharany QR Memlekettik hatshysy - Syrtqy ister mınıstri Qanat Saýdabaev pen Avstrııanyń Eýropalyq jáne halyqaralyq ister jónindegi mınıstri Mıhael Shpındelegger sóz sóılep ashty. Eýropa tórinde ótken mádenı keshtiń egjeı-tegjeıin basylymda jaryq kórgen «Qazaq ónerine Eýropa jurtshylyǵy qol soqty» atty maqaladan oqı alasyzdar.

Memleket basshysy N.Nazarbaev orasan kóp adam shyǵyny bolǵan alapat zilzala saldaryna baılanysty Gaıtı Respýblıkasynyń Prezıdenti Rene Prevaldiń atyna kóńil aıtý jedelhatyn joldady. Onda Gaıtı Respýblıkasynda bolǵan qaıǵyly jaǵdaı Qazaqstanda tereń kúızelispen qabyl alynǵany atap ótilgen. «Qazaqstan Respýblıkasy halqy atynan jáne jeke óz atymnan zardap shekkenderdiń otbastary men ja­qyn-týystaryna azaly kóńilimdi bildirgim keledi. Qazaqstan Úkimeti Sizdiń elińizge barynsha gýma­nıtarlyq kómek kórsetedi», - delingen jedelhatta.

Eki kún Shymkentte kezdesip, alqaqotan keńes qurǵan Qazaqstan, Qyr­ǵyzstan, Tájikstan, Túrik­men­stan jáne Ózbekstan memleket­ara­lyq sý sharýashylyǵy úılestirý ko­mıssııasy jumysyn aıaqtady. Otyrysta 2009 jyly alynǵan mindettemelerdiń tolyqtaı oryn­dal­ǵanyna taldaý jasaǵan komıs­sııa músheleri 2010 jylǵa ar­nalǵan máselelerdi talqylady. Osyǵan oraı «Egemen Qazaqstan» gazetinde «Máseleniń túıini Qaıraqqum sý qoımasynda» degen taqyryppen maqala jarııalady. «Qazaqstan ótken jyly sýdan aıtarlyqtaı zııan shekken joq. Eko­logııalyq saýyqtyrý másele­le­rin­de qol jetken tabystary bar. Qyzylorda oblysynyń Aqylaq jáne Áıteı sý bógetteri arqyly 500 mln. tekshe metrge deıin sý jınalǵan. Bul - sońǵy 10-11 jyl kóleminde jınalmaǵan mólsher. Sonyń arqasynda egis kólemin ulǵaıtyp, balyq sharýashylyǵyn órkendetýge múmkindik týǵan», dep jazady basylym.

Keshe Úkimet basshysy Kárim Másimovtiń qatysýymen Energetıka jáne mıneraldyq resýrstar mınıstrliginiń keńeıtilgen alqa májilisi bolyp ótti. Onda mınıstrliktiń, «Samuryq-Qazyna» UÁQ-tyń: onyń ishinde «QazMunaıGaz» UK» AQ, «Qazatomónerkásibi» UAK» AQ, «Samuryq Energo» AQ-tardyń ótken jylǵy jumysynyń negizgi qorytyndylary qaraldy. Alqa májilisinde Energetıka jáne mıneraldyq resýrstar mı­nıstri Saýat Myńbaev jáne atalǵan kompanııalardyń basshylary esep berdi. Alqaly jıyn barysynda aıtylǵan jaıttarmen «Egemen Qazaqstan» gazetinde jaryq kórgen «Energetıkalyq salanyń erteńi órkendi» atty maqaladan egjeı-tegjeıli tanysa alasyzdar.

«Kazahstanskaıa pravda» gazetiniń jazýynsha, QR Energetıka jáne mıneraldyq resýrstar mınıstriligi Aqtaýda atom elektr stansysyn salý, salmaý týrasynda kúmándanyp otyr. Bul kózqarasty atalǵan vedomstvonyń basshysy Saýat Myńbaev keshe Úkimet basshysynyń qatysýymen ótken mınıstrliktiń keńeıtilgen alqasynda bildirgen.

Eger merdigerler elektr energııasynyń baǵasy boıynsha eshqandaı mindettemeler jáne tehnıkalyq táýekelder boıynsha baısaldy kepil bermese joba júzege asyrýǵa turarlyq pa? Osy máselege EMRM mamandary kóńil aýdaryp otyr.

Alqa májilisi jaıynda «Alash aınasy», «Espress-K», «Lıter» basylymdarynan da keńinen oqı alasyzdar.

***

Keshe Úkimet basshysy Kárim Másimovtiń qatysýymen Indýstrııa jáne saýda mınıstrliginde ótken jylǵy atqarylǵan jumystardyń qorytyndylary men aldaǵy maqsat-mindetterin talqylaýǵa arnalǵan keńeıtilgen alqa májilisi ótti. Osyǵan oraı «Aıqyn» gazetiniń senbilik nómirinde «Biz tek ózimizge ǵana arqa súıeı alamyz» degen taqyryppen maqala jaryq kórdi. Onda «Mınıstrlik saýda-ónerkásiptik palatanyń, «Atameken» odaǵynyń» belsendi qoldaýymen 2009 jyly ártúrli eldermen ekijaqty 17 bıznes-forým ótkizdi. 150-den astam sheteldik kompanııamen kelissózder júrgizildi, onyń 72-si endigi bizben naqty jobalar boıynsha kelissózderge kiristi», degen vedomstvo basshysy Áset Isekeshevtiń sózi keltirilgen.

Bul alqa májilisi jaıynda «Egemen Qazaqstan», «Alash aınasy», «Espress-K», «Kazahstanskaıa pravda» basylymdary da egjeı-tegjeıli jazǵan.

«Aıqyn» gazetiniń dástúrli «Aq sóıle!» aıdarynyń búgingi qonaǵy - ekonomıka ǵylymynyń doktory, professor Sedep Mirjaqypova. Ekeýara áńgime barysynda basylym qonaǵy ekonomıkalyq naryq, qarjy daǵdarysy, onyń negizgi sebepteri, nesıe saıasaty, elimizdiń bank qyzmeti traly saýaldarǵa tuşymdy jaýap bergen. «Qaıtarylmaǵan nesıege qaryz alýshy men bankter birdeı jaýapty bolýy tıis» degen taqyryppen jaryq kórgen suhbattyń tolyq nusqasyn basylymnyń búgingi sanynan oqı alasyzdar.

«Keshe qos shatyrly Parlamenttiń Joǵarǵy palatasynyń depýtattary jańa 2010 jyldaǵy alǵashqy jalpy otyrystaryna jınaldy», dep jazady «Aıqyn» gazeti. Basylymnyń jazýynsha, jıyndy ashqan Senat Tóraǵasy Q.Toqaev 2009 jyldyń memleket pen qoǵam úshin aıtarlyqtaı mańyzdy oqıǵalarǵa toly bolǵandyǵyna toqtala kele, ótken jylǵa ókpe joqtyǵyn, al jańa jyldan úmit kóp ekendigin, «Barys jyldynda» senatorlar aldynda da óte aýqymdy, mańyzdy maqsattar turǵanyn aıtqan. Maqala «Qazaqstannyń tóraǵalyǵy - EQYU damýynyń jańa satysy» degen taqyryppen berilgen.

El senatorlardyń alǵashqy otyrysy jaıynda jazylǵan kelesi maqalany «Egemen Qazaqstan», «Alash aınasy» gazetterinen de oqı alasyzdar.

«Senator atom óndirisin Elbasynyń tikeleı basshylyǵyna berýdi usyndy». «Alash aınasy» gazetiniń jazýynsha, bul pikirdi keshe Parlament Senatynyń 2010 jyldyń alǵashqy jalpy otyrysynda senator Ǵanı Qasymov bildirgen. «Qazaqstannyń atom ónerkásibi salasyndaǵy jaǵdaılardy retke keltirý úshin ózindik derbes organ qurý kerek. Mundaı derbes komıtet qandaı da bir mınıstrlikke emes, tikeleı Memleket basshysyna, ne bolmasa Qaýipsizdik keńesine baǵynatyn bolýy shart», depti senator.

«Alash aınasy» gazetiniń senbilik nómirinde Qazaqstan tarıhshylar qaýymdastyǵynyń tóraǵasy Mámbet Qoıgeldimen aradaǵy suhbat jaryq kórdi. Ekeýara áńgime barysynda ǵalym «Sońǵy jyldary, ókinishke qaraı, tarıh ǵylymyna kezdeısoq adamdar kóp aralasyp ketti. Oǵan, tarıhshylar, ózimiz de kinálimiz. Kezinde daıarlyǵy jetimsiz kóp kisilerdiń tarıhı taqyrypqa kandıdattyq jáne doktorlyq dıssertatsııalar qorǵaýyna múmkindik berdik», degen pikirin bildirgen.

***

«Búgin elimizge Máskeý jáne búkil Reseı patrıarhy Kırıll keledi. Dinbasynyń saparyna elimizde aıtarlyqtaı mán berilýde. Belgili dinı kósemniń qadamyna qazaq pen orys halyqtarynyń dostyǵy, Aqorda men Kreml arasyndaǵy yntymaq burynǵydan da nyǵa túserine senim basym», dep jazady «Astana aqshamy» gazeti.

Búgin elorda tórinde bokstan Qazaqstan chempıonaty bastalady. Osyǵan oraı «Astana aqshamy» gazetinde «Baıraqty báseke» degen taqyryppen maqala jaryq kórdi. Onda ár salmaq dárejesinde kimderdiń el chempıony atanýy múmkin ekendigin tarqatyp jazǵan.