Qazaqstannyń toǵyz qumalaq oıynshylary halyqaralyq jarysqa qatysady
ASTANA. QazAqparat - Mońǵolııanyń Ólgıı qalasynda 2014 jyldyń 23-26 maýsymynda toǵyzqumalaqtan halyqaralyq birinshilik ótedi. Básekege Qazaqstan, Qyrǵyz Respýblıkasy, QHR-dan, Mońǵolııanyń Ulanbatyr qalasynan, Ývs pen Baıan-Ólgıı aımaǵynan, Reseıden, barlyǵy 9 komanda, 54 sportshy qatysady, dep habarlaıdy kazsporttv.kz Ulttyq sport túrleri qaýymdastyǵynyń resmı saıtyna sálteme jasap.
Báseke - shveıtsar júıesi boıynsha erler, áıelder, uldar men qyzdar arasynda jekeleı komandalyq esepte ótkiziletin boldy. Saıysqa 10 tóreshi qazylyq jasaıdy. Aqyl-oı sportynyń álemdik ozyq úlgileriniń biri sanalatyn qazaq halqynyń ulttyq rýhanı oıyny «Toǵyzqumalaq» - Mońǵolııadaǵy qazaqtar arasynda da keń taraǵanymen, ótken ǵasyrdyń sońǵy jartysynda biraz ýaqyt umyt qalyp, 1990 jyldardan bastap qaıta jańǵyrdy. Bul oıyndy halyqqa alǵash nasıhattaýshylary Mamyrhan Qojahmetuly men Bilál Sábıuly syndy azamattar boldy.
