Qazaqstannyń toǵyz qalasynda bıologııalyq qorǵanys bólimsheleri dezınfektsııalady

NUR-SULTAN. QazAqparat - Tótenshe jaǵdaı jarııalanǵan kúnnen bastap Nur-Sultan, Almaty, Shymkent, Aqtaý, Aqtóbe, Atyraý, Qaraǵandy, Qyzylorda, Taraz qalasynda ornalasqan nysandar men olardyń aýmaǵyn Qarýly kúshterdiń bıologııalyq qorǵanys bólimsheleriniń áskerı qyzmetshileri arnaıy zalalsyzdandyrý jumysyn júrgizip jatyr, dep habarlaıdy QazAqparat QR Qorǵanys mınıstrligine silteme jasap.

Maındanda jappaı joıý qarýynan qorǵaýmen aınalysatyn áskerılerdi azamattyq qorǵanys jumystaryna tartý – bul qajettilik. QR Prezıdenti – Qarýly kúshterdiń Joǵary Bas qolbasshysynyń tapsyrmasyna sáıkes dezınfektsııalaý jumystarynyń aýmaǵy keńeıtilip, bıologııalyq qorǵanys bólimsheleriniń sany arttyryldy.

Nur-Sultan qalasynda dezınfektsııalaý qalaı júrgizilip jatqanyn Qorǵanys mınıstri Nurlan Ermekbaev tekserdi. Áńgimelesý barysynda ol áskerı qyzmetshilerdiń Qazaqstan azamattarynyń densaýlyǵy saqtaýda atqaratyn jumystary mańyzdy jáne aýqymdy ekendigin aıtyp ótti.

«Áskerılerdiń ereksheligi – beıbit kezde isi kórinbeıdi tek, qıyn kezde kómekke keletindiginde», – dedi Nurlan Ermekbaev sap túzegen sarbazdar men serjanttarǵa aıtqan sózinde. Elimizde qajetti sharalar jasalyp, ınfektsııaǵa qatysty jaǵdaı baqylaýǵa alynǵan, biraq saq bolyp, sabyrlyq tanytý qajet.

«Sizderge basshylyq qana qarap otyrǵan joq, týǵan-týys, dos jáne barlyq qazaqstandyqtar qurmetpen qarap, úmit artyp otyr», – dedi mınıstr.

Áskerı qyzmetshilerdiń saýlyǵyn qorǵaýǵa da asa mán berý kerek. Bir jaýynger aýyryp qalsa bólimsheniń ǵana emes, búkil áskerı bólimniń jaýyngerlik ázirligine nuqsan kelýi múmkin. Áskerıler barlyq sanıtarlyq-gıgıenalyq normalardyń talaptaryn qatań saqtap, indettiń alǵashqy belgisin bilýi qajet jáne ondaı baıqalǵan kezde basshylyqqa jedel túrde baıandaýy tıis.

Áskerılerge túsken aýyrtpalyq eskerilip, taǵam ratsıonyna vıtamınder qosylyp ózgertiledi. Olar kún saıyn monshaǵa barady, kıimin arnaıy suıyqpen tazalaıdy, sondaı-aq jeke gıgıena quralymen ýaqytyly qamtamasyz etilgen. Jumys barysynda áskerıler dalada kóp ýaqyt ótkizetindikten sektorlarda arnaıy bıodárethana jáne sol mańdaǵy ǵımarattarǵa kirip-shyǵýyna múmkindik berý qarastyrylyp jatyr.

Ekologııaǵa zalal keltirmeý úshin jumysta paıdalanylatyn eritindi daıyndaýdyń ádisin baqylaý mindettelgen. Dezınfektsııalanatyn nysan men aýmaq tolyqtaı óńdelýi tıis. Odan basqa quraldardy aýystyrý men jóndeý máselesi de sheshilýde.

Qorǵanys vedomstvosynyń basshysy áskerı qyzmetshilerge alǵys aıtty, onyń ishinde túnde qaladaǵy iri nysandy jáne qala mańyndaǵy kenttegi indet oshaǵyn shuǵyl dezınfetsııalaǵandarǵa da alǵys bildirdi.