Qazaqstannyń TMD-daǵy tóraǵalyǵyna joǵary baǵa berildi

ASTANA. QazAqparat – Qazaqstan TMD aıasyndaǵy kópjaqty yntymaqtastyqtyń bastamashysy jáne lokomotıvi bolyp otyr. Bul týraly TMD Atqarýshy komıtetiniń tóraǵasy Sergeı Lebedev aıtty, dep habarlaıdy QazAqparat tilshisi.

«TMD Úkimet basshylary keńesiniń otyrysy tabysty ótti. Osy oraıda bıyl Qazaqstan Respýblıkasynyń Táýelsiz Memleketter Dostastyǵyndaǵy tóraǵalyǵy jemisti bolǵanyn atap ótken jón. Qazaq dostarymyzdyń tóraǵalyǵymen qonaqjaı Qazaqstan jerinde jáne osy elden tys aýmaqtarda da kóptegen aıtýly is-sharalar ótti», - dedi S. Lebedev Astanada ótken TMD úkimet basshylary keńesiniń otyrysynan keıingi brıfıngide.

Bul turǵyda ol Qazaqstan únemi TMD aıasyndaǵy kópjaqty yntymaqtastyqtyń bastamashysy jáne lokomotıvi bolǵanyn basa aıtty.

«Qazaqstannyń tóraǵalyǵy aıasynda kóptegen bastama kóterilip, olar sátti júzege asty», - dedi S. Lebedev.

Qazaqstan Táýelsiz Memleketter Dostastyǵyndaǵy tóraǵalyǵyn resmı túrde Qyrǵyzstanǵa tapsyrdy.

Budan buryn habarlanǵandaı, elordada TMD Úkimet basshylary keńesiniń otyrysy ótti.

Bul rette otyrys qorytyndysy boıynsha birneshe qujatqa qol qoıyldy.