Qazaqstannyń tikushaqshylary «Avıadartsta» úshinshi oryn aldy (FOTO)
Saıystyń úzdikteri qatarynda qazaqstandyq tikushaqshylar da bar. Olar úshinshi orynǵa turaqtady. «Jerústi nysanalar boıynsha jaýyngerlik qoldaný» saıysynyń sońǵy kezeńi sheńberinde ushqyshtar mejelerdiń ártúrli úlgileri boıynsha zymyran-zeńbirektik jáne bombalyq qarý-jaraqty jaýyngerlik qoldanýǵa synaq ushýlardy oryndady.
Qazaqstannyń komandalary arasynda armııalyq avıatsııanyń ushqyshtary - Mı-171Sh tikushaqtaryndaǵy eki ekıpaj bárinen jaqsy óner kórsetti. Birinshi ekıpajdyń quramynda býyn komandıri kapıtan Grıgorıı Kondratıýk, ushqysh-shtýrman aǵa leıtenant Abaı Boranbaev jáne bort tehnıgi kapıtan Aleksandr Kýtsenko.
Ekinshi ekıpajdyń quramynda ekıpaj komandıri kapıtan Almas Taǵaev, shtýrman leıtenant Sergeı Kondratıýk pen bort tehnıgi kapıtan Raýan Atanbuzov.
Dál osy ushqyshtar sheshýshi sátte judyryqtaryna barlyq kúsh-jigerlerin jınap, tolqynys pen sezimdi artqa tastap jáne sáttilikke jetýge bet alyp, baǵdarlamanyń barlyq túrlerinde jaqsy nátıjeler kórsetýge tyrysyp baqty. Sondaı-aq, «Dýbrovıchı» polıgonyndaǵy baıqaýdyń sońǵy kezeńi barysynda Reseı Federatsııasy Áýe-ǵarysh kúshteri ushqyshtarynyń qatysýymen «Avıamıks» avıatsııalyq shoýy ótti. Sý jańa joıǵyshtar, bombalaýshylar men tikushaqtardyń 70-ten asa ekıpajy áýe dýelderin oınap, jerústi nysanalar boıynsha avıatsııalyq zymyrandardyń iske qosylýyn júzege asyrdy, áýe mejeleriniń qaǵyp alynýyn, aýyr júkterdiń dáldikke laqtyrylýyn pysyqtady, sondaı-aq, jeke dara jáne top quramynda joǵary pılotaj fıgýralaryn pash etti.
Eske sala ketsek, «Avıadarts» baıqaýy Armııa halyqaralyq oıyndary - 2016 sheńberinde ótýde. Oǵan Qazaqstan, Reseı, Qytaı jáne Belarýstiń ushqyshtary qatysýda. Saıysta Sý-25, Sý-27, MıG-29 ushaqtary men Áskerı-áýe kúshteri Mı-171Sh tikushaqtarynyń ushý jáne ınjenerlik-tehnıkalyq quramdary elimizdiń namysyn qorǵady. «Áýe has sheberler» pılotajdaý, dál oq atý men bomba laqtyrý sheberliginde, sondaı-aq, sporttyq alańdarda saıysqa tústi. Odan basqa, bıylǵy jyly nysanalar úlgileriniń sany eki esege ulǵaıtylǵanyn aıta ketken jón.
