Qazaqstannyń tennısshi qyzdary Bıllı Djın Kıng kýbogynyń fınalynda oınaıdy
NUR-SULTAN. QazAqparat - ITF tennısten áıelder arasynda álem chempıonatyn Shotlandııanyń Glazgo qalasynda ótkizý týraly sheshim qabyldady, dep habarlaıdy QazAqparat tilshisi.
Qazaqstan tennıs federatsııasynan málim etkendeı, budan buryn irikteý saıysynda jeńilip qalǵan Ulybrıtanııa quramasy kort ıesi retinde qatysatyn boldy.
8-13 qarasha aralyǵynda «Emıreıts» arenasynyń jabyq kortynda ótetin básekege Ulybrıtanııadan basqa taǵy 11 komanda óner kórsetedi.
Atap aıtqanda, bedeldi jarysta Qazaqstan, Aýstralııa, Belgııa, Kanada, Chehııa, Italııa, Polsha, Ispanııa, Slovakııa, Shveıtsarııa jáne AQSh baq synaıdy.
Glazgo - sondaı-aq erler arasynda Devıs kýbogy toptyq kezeńiniń oıyndary ótetin tórt qalanyń biri.
Qazaqstan erler quramasy dál osy qalada D tobynda AQSh, Ulybrıtanııa, Nıderlandy komandalarymen taıtalasqa túsedi.
