Qazaqstannyń tennıs federatsııasy jyldyń úzdik jas tennısshilerin atady
ASTANA. 14 jeltoqsan. QazAqparat - Qazaqstannyń tennıs federatsııasy búgin Astanada dástúr boıynsha 2012 jyldyń úzdik jas tennısshileriniń esimderin atady.
Federatsııa atalmysh syılyqtardy 2010 jyly qurǵan bolatyn. «2012 jyldyń eń úzdik jas tennısshisi» ataǵyna 1998-1999 jyldary týǵan qaraǵandylyq Grıgorıı Lomakın men almatylyq Arına Talýenko ıelendi. Oıyndary joǵary baǵaǵa ıe bolǵan balǵyndardyń árqaısysyna 10 myń AQSh dollary kóleminde granttar bólindi. Bul qarajat sportshylardyń biliktilik deńgeıin joǵarylatýǵa baǵyttalady.
Sonymen qatar 12 jáne odan kishi jas kategorııasyndaǵy balalar arasynda da bolashaǵynan úmit kúttirer daryndy sportshylar marapattaldy. Munda shymkenttik Dastan Tashbýlatov pen Adelaıda Allahverdıeva jyldyń jeńimpaz oıynshylary atandy.
Sondaı-aq, federatsııanyń qorytyndy konferentsııasynda jyldyń úzdik bapkerleriniń eren eńbekteri elenip, olarǵa úlken qurmet kórsetildi. Jyl jattyqtyrýshysy bolyp Artem Shaıbakov jáne Vladımır Shegaı atansa, Pavel Baranov pen Vladımır Ogonıan «Tennıs sport túriniń damýyna qosqan úlesi úshin» alǵys hattarymen marapattaldy.
