Qazaqstannyń temirjolshylary qaýipsizdik máselesine alańdaýly
ASTANA. QazAqparat - Bıylǵy jyldyń 20 qyrkúıegi kúni elordanyń temirjol ótkelderi men «Nurly jol» vokzalynda qozǵalys qaýipsizdigi máselesine baılanysty arnaıy aktsııa ótti, dep habarlaıdy QazAqparat «Qazaqstan temir joly» UK» AQ-nyń baspasóz qyzmetine silteme jasap.
Aktsııa barysynda mashınıster men olardyń kómekshileri kólik júrgizýshileri men jolaýshylarǵa temir jolda júrý erejelerin saqtaý qajettigin eskertip, sondaı-aq, arnaıy jadynamalar taratty.
Temirjolshylar poıyzdar men lokomotıvterdiń kóliktermen soqtyǵysý jaǵdaılaryna alańdaýly. «QTJ-Júk tasymaly» AQ derekteri boıynsha, bıylǵy jyldyń 8 aıynda lokomotıv brıgadalary túrli qaýipterge baılanysty tejegishti 1700-den astam ret basýǵa májbúr bolǵan. Jyl saıyn temir jol ótkelderinde ortasha alǵanda shamamen 20 qaıǵyly oqıǵa bolyp, júzden astam adam kóz jumǵan.
«Álbette, árbir adam qaýipsizdiktiń qarapaıym erejelerin saqtar bolsa, mundaı oqıǵalardyń birde biri bolmas edi»,-delingen temirjolshylar tartqan aqparatta.
QTJ-Júk tasymaly» AQ óndiristik qaýipsizdik jónindegi atqarýshy dırektory Aıtym Quraqbaevtyń aıtýynsha, temir joldaǵy qaıǵyly jaǵdaılardyń basym bóligi, azamattardyń mas kúıde joldy ruqsat etilmegen jerden kesip ótýinen nemese qulaqqappen mýzyka tyńdap, qaýipti joldan óterde telefonmen sóılesýinen bolyp otyr.
«Jyl saıyn temir jolda qaıǵyly oqıǵalardyń aldyn alý úshin biz, azamattardyń ómiri men densaýlyǵyn qorǵaýǵa baǵyttalǵan uıymdastyrýshylyq-profılaqtıkalyq sharalar júrgizemiz. Máselen, jyl basynan beri jergilikti turǵyndarmen 1600-den astam kezdesý ótkizilip, temir joldarda júrý erejeleri túsindirildi. Lektsııalardy 30 myńnan astam adam tyńdady. Oqý oryndarynda túsindirý jumystary júrgizildi», - deıdi ol.
Astana lokomotıv paıdalaný deposy bastyǵynyń orynbasary Aleksandr Nedıýjın, temirjolda poıyzben soqtyǵysýdyń aldyn alý múmkin emestigin aıtady.
«Bir sátte tutas quramdy birden toqtatý múmkin emes. 60-80 km/saǵat jyldamdyqpen kele jatqan poıyzdyń toqtatý úshin, 600-800 metr qajet», - deıdi ol.
Temirjolshylar qazaqstandyqtardy temirjol mańaıynda asa saq bolýǵa, jol erejelerin saqtaýǵa, temirjoldy belgilengen jáne jabdyqtalǵan jerlerden, kele jatqan poıyzdyń joqtyǵyna kóz jetkize otyryp nemese ótkel sıgnalızatsııasynyń ruqsat belgisi berilgende ǵana ótý kerektigin eskertedi.
«Ótkelge deıin toqta», «Artyq qadam - artyq problemalar», «Júrgizýshi, poıyzdy jiber!» degen sııaqty aqparattyq paraqshalardy taratqan mundaı aktsııalar «QTJ-Júk tasymaly» AQ - «Jol bólimsheleriniń» barlyq fılıaldarynda ótedi.
