Qazaqstannyń temirjol vokzaldarynda qosymsha tekserý júıesi engiziledi

ASTANA. QazAqparat - Qazaqstannyń 16 temirjol vokzalynda jolaýshylar men júkterdi tekserýdiń qosymsha júıesi engiziledi, dep habarlaıdy «Qazaqstan temir joly» ulttyq kompanııasy» aktsıonerlik qoǵamynyń baspasóz qyzmeti. 

Tekserý protsedýrasy jolaýshylardyń qaýipsizdigin qamtamasyz etý jáne terrorıstik áreketterdiń aldyn alý maqsatynda aǵymdaǵy jyldyń 1 aqpanynan bastap iske qosylady.

«Tekserý protsedýrasy elimizdiń vokzaldarynda kezeń kezeńimen engiziledi. 1 aqpannan bastap Almaty-1 men Almaty-2, 1 sáýirde Astana vokzalynda, al qalǵan 13 temirjol vokzaldarynda 1 maýsymda uıymdastyrylady. Osyǵan baılanysty 56 tekserýge arnalǵan jabdyq kesheni satyp alyndy», - dedi QTJ» UK» AQ magıstraldik jeli dırektsııasynyń Vokzal sharýashylyǵy departamentiniń dırektory Juban Kórpebaev.

Onyń aıtýynsha, bul oraıda tekseris ótip, poıyzǵa keshikpeý úshin jolaýshylar vokzaldarǵa aldyn ala kelýleri qajet.