Qazaqstannyń temir joldarynda jylyna 100-den astam qaıǵyly oqıǵa tirkeledi
NUR-SULTAN. QazAqparat - Qazaqstannyń temir joldarynda jylyna 100-den astam qaıǵyly oqıǵa tirkeldi. Elordanyń temir jolǵa jaqyn ornalasqan mektepterinde oqýshylarmen kezdesken temirjol salasynyń mamandary osyndaı derekter keltirdi.
Bul týraly QazAqparat «QTJ-Júk tasymaly» AQ baspasóz qyzmetine silteme jasap habarlaıdy.
Temirjolshylar mundaı kezdesýdi basqa emes balalardyń jazǵy demalysqa shyǵatyn ýaqytynda ótkizýdi jón dep tapqan. Óıtkeni balalardyń eresekterdiń nazarynan tys kóbirek júretin ýaqyty da osy kez. Shara barysynda Nur-Sultan vakzaly men lokomotıv paıdalaný deposynyń ókilderi balalarǵa temir jol mańynda júrý men ótkelderden ótýdiń negizgi erejeleri týraly aıtty.
Mashınıst-nusqaýshy Syrym Bekov qaýipsizdik tehnıkasy balalardyń jazǵy maýsymda jıi buzatyn erejeleri ekendigine toqtaldy jáne oǵan qatysty naqty málimetterdi kelterdi.
«Joldaǵy qaıǵyly jaǵdaılar ádette azamattardyń ruqsat etilmegen oryndardan ótýinen, uqypsyzdyǵynan bolyp jatady. Jastar qulaqqappen mýzyka tyndap nemese uıaly telefonmen sóılesip kele jatqanda mashınıst bergen dabyldy, lokomotıv daýsyn estimeıdi. Al 6 myń tonnalyq júk quramyn bir mezette toqtatý múmkin emes. Poıyzdyń tejelý joly mınımým 1000 metrdi quraıtyndyqtan, oqys jaǵdaıǵa tap bolý táýekeli óte joǵary», - deıdi mashınıst.
Sondaı-aq onyń derekterine qaraǵanda, statıstıka boıynsha jyl saıyn temir jolda 100-den astam qaıǵyly jaǵdaı bolady.
«Temir jolda tehnıka kóp: vagondar, lokomotıvter degen sııaqty. Olar balalardy ózine eriksiz tartady. Balalr vagondardyń ústine qyzyq úshin shyǵady da onyń saldary nege alyp keletinin oılaı bermeıdi. Jazǵy demalys kezinde balalarǵa ata-analary men muǵalimder tarapynan erekshe baqylaý kerek», dep atap kórsetti Nur - Sultan stantsııasynyń qozǵalys qaýipsizdigi jónindegi bas maman Marjan Aıtmaǵanbetova.
«QTJ-Júk tasymaly» AQ temir joldaǵy qozǵalys qaýipsizdigi buzylýy qaıtalanýynyń aldyn alý jónindegi is-sharalardy júıeli túrde ótkizip keledi.
