Qazaqstannyń taýly óńirlerinde 119 myń úı tirkelmegen
ASTANA. QazAqparat - Májilistiń jalpy otyrysynda depýtat Omarhan Óksikbaev seısmologııalyq aýdandarda úılerdi paıdalanýǵa berý baǵytynda týyndaǵan problemalardy málim etti, dep habarlaıdy QazAqparat.
Osy oraıda ol seısmıkalyq belsendi aýdandarda úılerdi paıdalanýǵa berý turǵysynda erekshe normalarǵa qatysty máseleni kóterdi.
«Normalar jobalaý-smetalyq qujattama men onyń saraptamasynyń bolýyn, merdigerlik shartty, qurylys barysyna kelisimdik negizde tehnıkalyq jáne avtorlyq baqylaýdy iske asyrý qamtıdy. Zańnamada ókiletti organnyń tıisti tehnıkalyq qyzmetterdi tirkeýi, merdigerlik uıymdardy lıtsenzııalaýy baǵytynda birqatar jumystardy júrgizýi eskerilgen. Óz kezeginde jergilikti atqarýshy organdar osy aýdandarda jeke turǵyn úı qurylysy máselelerinde jańa talaptardy júzege asyrýdy qamtamasyz etýi tıis edi. Azamattardyń ótinimine súıensek, atalǵan óńirlerde jeke turǵyn úı qurylysy turǵysynda qurylys pen nysandy paıdalanýǵa bergen kezde zańnama normalarynyń talaptaryn qamtamasyz etý boıynsha quzyrly organdarmen tıisti jumystar júrgizilmegen»,-dep toqtaldy depýtat Úkimet basshysy B. Saǵyntaevqa arnalǵan saýalynda.
Osy oraıda ol ásirese aýyldyq jerlerde jobalyq jáne merdiger uıymdardyń, tirkelgen sarapta qyzmetteri men tehnıkalyq baqylaý qyzmetteriniń jetispeýshiligi azamattardyń úılerdi zańnyń normalaryn oryndamaı salýyna, sondaı-aq qajetti qyzmetterdiń shamadan tys ósýine alyp kelgenin atap ótti. Onyń aıtýynsha, bul faktorlar aýyldyq jerlerde qurylys qarqynyn tejep tur, sonymen qatar ádilet organdarynda baspanany tirkeýde kedergiler týdyrýda.
«Búginde quzyrly organdardyń málimetinshe, bes óńirde, ıaǵnı Almaty, Shyǵys Qazaqstan, Jambyl, Ońtústik Qazaqstan oblystarynda jáne Almaty qalasynda jalpy aýdany 9,9 mln. sharshy metrdi quraıtyn tirkelmegen 119 myńǵa jýyq jeke úıler men qurylystar anyqtalǵan. Jeke turǵyn úıdiń tirkeýde turmaýy adamdarǵa balalaryn mektep pen balabaqshaǵa ornalastyrýǵa, aýrýhanaǵa tirkelýge, jumysqa turýǵa, memlekettik áleýmettik kómek alýǵa, sondaı-aq sharýashylyǵyn júrgizýge múmkindik bermeıdi»,-dedi O. Óksikbaev.
Sóz sońynda depýtat atalǵan máseleni qarastyrý barysynda seısmıkalyq belsendi aýdandarda jeke turǵyn úılerdi salý tetikterin jeńildetýde tıisti sharalardy qamtý kerektigin surady.
