Qazaqstannyń Táýelsizdik kúni Túrkııanyń úsh qalasynda toılandy
Qazaqstannyń Túrkııadaǵy Elshiligi men qazaqstandyq stýdentterdiń uıymdastyrýymen Ankara qalasynda ótken merekelik keshke belgili kompozıtor Besher Ahmet, dombyrashy Akdenız Erbash, Sedat Solakoǵlý, Bekarys Jandáýlet, ánshi Gúldara Úsenǵalıeva, Áset Zakırov jáne t.b. ónerpazdar qatysty.
Quttyqtaý sóz sóılegen Elshi Abzal Saparbekuly Táýelsizdik kúni merekesimen barlyq kórermendi quttyqtap, sharany uıymdastyrǵan jas ónerpazdar men qoldaý bildirgen mekemelerdiń ókilderin alǵys hatpen marapattady.
Sakarııa qalasynda jalǵasqan atalǵan sharaǵa Almaty qalasynan arnaıy kelgen «Sarytaýqum» ult aspaptar ansambli, Ystanbuldyń belgili kompozıtorlary Besher Ahmet pen Jıhan ıÝrtshy, dombyrashy Sedat Solakoǵlý jáne qazaqstandyq stýdentter qatysyp, óz ónerlerin pash etti. Merekeli is-shara aıasynda Sakarııa qalasyndaǵy qazaq jastary ulttyq taǵamdar daıyndap, qonaqtarǵa tartý etti. Ulttyq-etnografııalyq buıymdardyń kórmesin ótkizdi.
Kontserttiń ashylý saltanatynda sóz sóılegen Elshi Abzal Saparbekuly Qazaqstan Respýblıkasynyń Táýelsizdik jyldarynda qol jetkizgen jetistikterdi atap ótti.
Elbasy N.Á.Nazarbaevtyń ustanǵan salıqaly saıasaty egjeı-tegjeı baıandap, Qazaqstan-Túrkııa qarym-qatynastardyń joǵary deńgeıde jalǵasyp otyrǵandyǵyn jetkizdi. Sóz sońynda Elshi Sakarııa qalasynyń ákimdigine jáne qala turǵyndaryna alǵys aıtyp, Táýelsizdik merekesimen quttyqtady.
Merekeli kontserttik baǵdarlamalardyń aıasynda Gıresýn qalasynda ótken shara resmı kezdesýlermen bastaldy. Elshi A.Saparbekuly Gıresýn gýbernatory Harýn Saryfakyoǵýllary jáne Gıresýn qalasynyń meri Kerim Aksýmen kezdesýler ótkizdi. Júzdesýlerden keıin Gıresýn ýnıversıteti Halyqaralyq mádenıet jáne óner qaýymdastyǵy «Qazaqstan táýelsizdiginiń 26 jyly» atty kontsert ótti.
Qazaqtyń áni áýelegen kontsertke Elshi A.Saparbekuly, Gıresýn ýnıversıtetiniń rektory J.Joshkýn, Gıresýn qalasynyń gýbernatory H.Saryfakyoǵýllary, Gıresýn qalasynyń meri K.Aksý, qazaqstandyq stýdentter men qala turǵyndary qatysty. Kontserttiń ashylý saltanatynda sóz sóılegen Qazaqstannyń Túrkııadaǵy Elshisi elimizdiń táýelsizdik jyldaryndaǵy jetistikteri týraly baıandama jasap, Gıresýn qalasynyń gýbernatory men merine alǵys aıtty.
