Qazaqstannyń tanymal juldyzdary áleýmettik jeliler arqyly 8 naýryz merekesimen quttyqtaýlar joldady
ASTANA. QazAqparat - Qazaqstannyń tanymal juldyzdary, qoǵam qaıratkerleri, ánshiler men akterler, mýzykanttar áıelder qaýymyn 8 naýryz - Halyqaralyq áıelder kúnimen quttyqtap jatyr. «QazAqparat» HAA áleýmettik jelilerde tanymal tulǵalardyń jeke paraqshalarynda jarııalanǵan quttyqtaýlarǵa sholý jasaǵan bolatyn.
Qazaqstan Parlamentiniń eks-depýtaty, «Órleý» Ulttyq ortalyǵy» AQ dırektorlar keńesiniń tóraǵasy Murat Ábenov 8 naýryz merekesine arnap Qazaqstannyń barlyq názik jandylaryna erekshe syı ázirlegen eken. Facebook paraqshasynda ol beınebaıan arqyly áıelder qaýymyn kóktemniń shýaqty merekesimen quttyqtaıdy.
«Barlyq áıelder qaýymyn 8 naýryz merekesimen quttyqtaǵym keledi. Búgin kún de erekshe bolyp tur. Tabıǵattyń ózi kóktemgi qubylysy arqyly bul merekeniń ereksheligin kórsetedi, bul: kóktem merekesi, mahabbat pen bir-birimizge degen syılastyq merekesi. Osyǵan baılanysty bizdiń analarymyzdy, aıaýly jarlarymyzdy, qyzdarymyzdy, áriptesterimizdi, bizdi tárbıelep ósirgen ustazdarymyzdy kóktemniń shýaqty merekesimen quttyqtaǵym keledi», - deıdi M. Ábenov.
Al tanymal qazaqstandyq prodıýser Baıan Esentaeva óziniń Instagram paraqshasynda qysqasha jazba qaldyryp, onda barlyq áıel zatyn 8 naýryz merekesimen quttyqtaıdy. «Halyqaralyq áıelder kúnimen! Barlyqtarymyzdy kóktem, mahabbat pen jańǵyrý merekesimen quttyqtaımyn!!!» - dep jazady ol.
Al ánshi Aıqyn Tólepbergen Instagram áleýmettik jelisinde barsha qazaqstandyqtarǵa baqyt tiledi. «Meıramdaryńyzben, Analar! Qyzdar!!! Meıramdaryńmeeeeeeeen !!! Analar, Arýlar!!! Baqytty bolyńdaaaaaar!!!- (dep aıqaılap turmyn)», - dep jazady Aıqyn.
Tanymal ánshi Qaırat Nurtas ta 8 naýryz merekesimen quttyqtaýlarǵa qosylady. Qazaqstandyq juldyz Instagram paraqshasynda eń aldymen óziniń Anasyna baqyt tileıdi. «Aıaýly analarymyzdy, Apalarymyzdy, ardaqty ápkelerimizdi, jaısań jeńgelerimizdi, erke qaryndastarymyz ben qyzdarymyzdy, sylqym qudashalarymyzdy, ıaǵnı barlyq arýlarymyzdy kóktem merekesimen quttyqtaımyn!!! Baqytty bolyńyzdar!» - dedi Qaırat Nurtas.
Áleýmettik jelini belsendi paıdalanatyn Qazaqstannyń Aralas jekpe-jek Federatsııasy MMA prezıdenti Anatolıı Kım de óziniń jeke quttyqtaýyn bildiredi. Ol sondaı aq London Olımpıadasynyń chempıony Serik Sápıevtyń quttyqtaý hatyn da qosa jarııalapty.
«Serik Sápıev @serik_sapiyev pen barlyq jaqsy jigitterdiń osy quttyqtaýy Sizderge arnalady, aıaýly hanymdar! Kúıeýlerińizdi birinshi raýndta nokaýtqa jiberýlerińizge tilektespiz! Árqashan baqytty bolyńyzdar, árqashan súıikti, súıkimdi bolyńyzdar! Olaı bolmasa, biz de erkek bola almaspyz!» - dep jazady aralas jekpe jek Federatsııasynyń basshysy.
Buǵan deıin «Aq jol» partııasynyń tóraǵasy Azat Perýashev ta óziniń quttyqtaýyn joldap, áıelder qaýymynyń qurmetine «Almatym meniń» atty ánin Jeńis Seıdollaulymen birge shyrqaǵan bolatyn.
