Qazaqstannyń tanymal sýretshileri Abaı eline úzdik týyndylaryn tartý etti
ASTANA. QazAqparat - Semeı qalasyndaǵy Abaıdyń «Jıdebaı-Bórili» memlekettik tarıhı-mádenı ádebı-memorıaldyq qoryq-mýzeıinde «Kıeli Shyńǵystaý» kórmesi ashyldy. Kórmege Abaı men Shákárim dúnıege kelgen kıeli óńirdi bir apta boıy aralaǵan sýretshilerdiń týyndylary qoıyldy, dep habarlaıdy «QazAqparat» HAA tilshisi.
Abaıdyń «Jıdebaı-Bórili» memlekettik qoryq-murajaıynyń baspasóz qyzmetinen habarlaǵandaı, kórmege Muhtar Áýezovtiń 120 jyldyǵyna oraı uıymdastyrylǵan sımpozıým barysynda salynǵan týyndylar qoıylǵan. Bir apta boıy Qazaqstannyń ár óńirinen kelgen sýretshiler Abaı, Shákárim, Muhtar syndy halqynyń uly perzentteriniń izderi qalǵan jerlermen júrip, aýasyn jutyp, kórikti de shejireli Shyńǵystaý óńirinde: Bórili, Kúshikbaı asýy, Tuma kóli, Jıdebaı, Úıtas, Kishi Orda, «Abaı-Shákárim» kesenesi, Abaıdyń anasy men ájesi - Uljan men Zere zıraty, Keńgirbaı bı mazary, Shyńǵystaý, Arhat taýlarynyń ásem jerlerinde, tabıǵat aıasynda plener ótkizip, 110-nan asa óner týyndysy salyndy.
Kórmeniń ashylý saltanatynda Abaıdyń «Jıdebaı-Bórili» memlekettik qoryq-mýzeıiniń dırektory Bolat Júnisbekov alǵy sózimen bastap, sımpozıýmǵa qatysqan barlyq sýretshilerge alǵysyn bildirdi. Sonymen qatar, Astana qalasynyń Sýretshiler Odaǵynyń tóraǵasy, mádenıet qaıratkeri Toqtar Ermekov, QR Sýretshiler Akademııasynyń tolyq múshesi, Qazaqstannyń eńbek sińirgen óner qaıratkeri, akademık Májıt Baıtenovke, Qazaqstan Sýretshiler Odaǵynyń múshesi, akademık Marat Týksaıtovqa, Qazaqstan Sýretshiler Odaǵynyń múshesi, QR Mádenıet qaıratkeri, keskindemeshi jáne grafık, pedagog Tóleýǵazy Baıǵalıevke «Abaı» medalin tabystady.
Atalmysh sharada Astana qalasynyń Sýretshiler Odaǵynyń tóraǵasy Toqtar Ermekov Abaı mýzeıiniń bir top qyzmetkerlerin Astana sýretshiler Odaǵynyń «Qurmet» mártebeli tósbelgisimen marapattady. Atyraý qalasynan kelgen J.Ádilqaıyr da Abaı mýzeıiniń ákimshiligine rızashylyǵyn bildirdi.
Sımpozıýmǵa qatysqan sýretshiler Abaıdyń qara shańyraǵyna 50-den astam týyndylaryn tartý etti.
