Qazaqstannyń tanymal kásipkerleri mektep oqýshylaryna sabaq beredi
ASTANA. QazAqparat - 2019 jyldyń qyrkúıeginde mektep baǵdarlamasyna «Kásipkerlik jáne bıznes negizderi» páni engiziledi jáne oqýshylarǵa Qazaqstannyń tanymal kásipkerleri sabaq beredi, dep habarlaıdy QazAqparat tilshisi.
10-11 synyp oqýshylaryna arnalǵan bul pán 2018 jyly pılottyq joba retinde birqatar mektepterge engizilgen.
«Bul pándi engizý jóninde 2015 jyly usynys bergenbiz. Bilim jáne ǵylym mınıstrligi ony qoldady. 2018 jyldan bastap, atalǵan pándi pılottyq joba retinde kóptegen mektepterde bastap kettik, 2019 jyldyń qyrkúıeginde mektep baǵdarlamasyna enetin bolady», dedi «Atameken» UKP Basqarma tóraǵasynyń orynbasary Eldar Jumaǵazıev Ortalyq kommýnıkatsııalar qyzmetinde ótken baspasóz máslıhatynda.
Jumaǵazıevtiń aıtýynsha, «Kásipkerlik jáne bıznes negizderiniń» basqa pánderden aıyrmashylyǵy - onyń ınteraktıvti túrde ótýinde bolmaq.
«Osyǵan baılanysty arnaıy portal jasap jatyrmyz. Qazaqstan boıynsha 10-11 synyp oqýshylary osy portalda otyrady. Árıne, olardyń kúndelikti Instagram, Feısbýkta qyzyǵyp oqıtyn keıipkerleri, paraqshalary bar. Olardyń kimge qyzyǵatynyn zerttep jatyrmyz. Ǵalymdarmen de pikir almastyq, olar Qazaqstanda ózin jaqsy kórsetip júrgen kásipkerlerdiń kóp ekenin aıtty. Solardyń ómirin aıta otyryp, balalardy kásipkerlikke baýlýdy jón kórip otyrmyz», - dedi ulttyq palata ókili.
Sondaı-aq, E. Jumaǵazıev jańa pánniń oqýlyǵy men oqytýshylarynyń da erekshe ekenin atap ótti.
«Pánniń oqýlyǵy daıyn. Bul bes jylǵa jaraıtyn klassıkalyq oqýlyq emes. Bul - únemi jetildirilip otyratyn onlaın-oqýlyq bolmaq. Eger bir baǵyt eskirer bolsa, jańasyna almastyramyz. Taǵy bir qyzyqty ádis: ár sabaqty Qazaqstannyń tanymal kásipkeri júrgizedi. Munda jaı muǵalimnen góri, ózin-ózi qalyptastyrǵan, áleýmettik jelide balalar qyzyǵyp qaraıtyn kásipkerler kóbirek senim týdyrady. Bul usynysty iri bıznes ókilderine aıtqanymyzda, olar qýana kelisti. Dereý qalam alyp, oqýshylarǵa ne aıtqysy keletinderin jaza bastady», - dedi ol.
E. Jumaǵazıevtiń aıtýynsha, jańa pán aıasynda Tımýr Qulybaev, Abylaı Myrzahmetov, Raıymbek Battalov syndy kásipkerler mektep oqýshylaryna kásipkerliktiń qyr-syryn úıretpek.
