Qazaqstannyń taǵy bir shtangyshysy qola medal aldy
ASTANA. Qarashanyń 26-sy. QazAqparat /Aıdyn Báımen/ - Búgin Ońtústik Koreıanyń Koıan qalasynda aýyr atletıkadan ótip jatqan Álem birinshiliginde Qazaqstannyń 24 jasar sportshysy Vladımır Kýznetsov álemdik dodanyń qola medalin jeńip aldy,
dep habarlaıdy QazAqparat.
85 keli salmaqta synǵa túsken Vladımır Kýznetsov eki jattyǵýynda da sátti óner kórsetti. Ol julqa kóterýde 170 kılony, serpe kóterýde 206 kılony baǵyndyrdy. Jalpy esepte Vladımırdiń úlesi 376 kılony qurady.
Osy salmaqta Qytaı eliniń sportshysy Lıý En jalpy esepte 383 kılo kóterip, bas júldeni ıelense, 380 kılo kótergen Belarýs sportshysy Sergeı Lagýn kúmis medaldi jeńip aldy.
Álem birinshiligi jalǵasýda. Ózge salmaqtar boıynsha dodaǵa túsip jatqan basqa da daryndy sportshylarymyz bar.
