Qazaqstannyń tabıǵatty paıdalanýshylary 2013 jyly shyǵaryndylar úshin sanktsııa merzimin uzartý múmkindigine ıe bolady

Bul týraly búgin Parlament Májilisinde «Kıoto hattamasyn Qazaqstanda júzege asyrý mehanızmderi» taqyrybynda ótken konferentsııa barysynda QR Qorshaǵan ortany qorǵaý mınıstri Nurlan Qapparov málim etti.

Mınıstrdiń aıtýynsha, kvotalaý men saýdalaý júıesin engizý 2013 jyly qolǵa alynyp, bul ilki jyl retinde belgilenedi. «Soǵan oraı, osy jyly tabıǵatty paıdalanýshylar úshin aıyppul sanktsııalaryn bir jylǵa keıinge shegerý múmkindigi qarastyrylady. Bul kvota alýda ońaılatylǵan mehanızmdi de qamtıdy. Budan bólek, osy pılottyq jyly qaýymdastyqtarmen birlese otyryp, qabyldanǵan normatıvtik bazalarǵa ózgerister men tolyqtyrýlar engizý kózdelýde», - dedi Nurlan Qapparov. Mınıstrdiń sózine qaraǵanda, bul shara bir jyl boıy turaqty negizge júzege asady.

«Sonymen qatar, jaqyn aralyqta biz birqatar erejelerdi, onyń ishinde kvotalardy bólý, berý sekildi máselelerdi qaıta qaraýǵa bastama jasaýǵa bekinip otyrmyz.  Sondaı-aq, Ekologııalyq kodekske ózgerister engizý máselesi de kózdeledi», - dedi mınıstr. Osyǵan oraı, qorshaǵan ortany qorǵaý vedomstvosynyń basshysy 2013 jyl boıynsha kvotalardy bólýdiń ulttyq jospary jasalǵanyn atap ótti. Bul rette 2010 jylǵy shyǵaryndylar mólsheri boıynsha 100 paıyzdyq deńgeıdegi kásiporyndar tegin kvotalardy ıelenetin bolady.

«Al tabıǵatty paıdalanýshylardyń arasynda paıda bolǵan tapshylyq naryqqa qatysýshy basqa oıynshynyń satyp alýlarymen jabylyp otyratyn bolady. Budan bólek, óndiristi keńeıtip, jańa qondyrǵylar engýzi qarastyrylǵan jaǵdaıda memlekettik rezervten de tegin kvotalar bólý qarastyrylady», - deıdi N. Qapparov.