Qazaqstannyń syrtqy saıasatyndaǵy tabystary eń aldymen Elbasy qaıratkerliginiń naqty kórinisi - Q. Toqaev

Búgin QR Parlamenti Senatynyń jalpy otyrysynda «Qazaqstan Respýblıkasynyń Konstıtýtsııasyna ózgeris engizý máselesi boıynsha Qazaqstan Respýblıkasy Prezıdentiniń respýblıkalyq refrendým taǵaıyndaýy týraly» Parlament depýtattarynyń usynysyn talqylaý barysynda Senat spıkeri Qasym-Jomart Toqaev osylaı málimdedi.

Óz sózinde Senat spıkeri Elbasy qaıratkerliginiń arqasynda qazaq memlekettiliginiń tarıhynda tuńǵysh ret shekarasy zańdy túrde bekitilgenin, táýelsiz memlekettiń bedeldi halyqaralyq uıymdarǵa, onyń ishinde BUU-ǵa múshe bolǵanyn atap ótti. «Búginde qazaqstandyqtardy álem tanyp, qurmetteıdi, pikirimizben sanasady. Dúnıejúzilik qoǵamdastyqqa Qazaqstan jaýapkershiligi zor memleket retinde belgili. Ózekti halyqaralyq problemalar boıynsha meıli qarýsyzdaný bolsyn, qaýipsizdik nemese ıntegratsııa máseleleri bolsyn bedelimiz bıik»,- degen palata tóraǵasy ótken jyly Qazaqstannyń EQYU-ǵa tóraǵalyq etý mártebesine ıe bolǵanyn da atap ótti.

«11 jyldyq úzilisten keıin Uıym sammıtiniń Astanada ótkizilýi osy mıssııanyń tabysty júze asqanyn dáleldeı túsedi. Astana deklaratsııasynyń qabyldanýynda Prezıdent N. Nazarbaev sheshýshi ról atqardy jáne bul onyń álemdegi joǵary bedeliniń kórsetkishi ekeni daýsyz»,-dedi spıker.

Sondaı-aq Senat Tóraǵasy Elbasy qaıratkerligine toqtala otyryp, barsha qazaqstandyqtardyń maqtanyshyna aınalǵan jańa Astananyń boı kóterýin de erekshe atap ótti. «Bul tarıhı oqıǵa máni jaǵynan ulttyq ıdeıaǵa astasyp jatyr. Astana - saıası-ekonomıkalyq jáne dinı mańyzy zor halyqaralyq forýmdar ótkiziletin iri qalaǵa aınaldy. Astana - Prezıdentimizdiń jasaǵan eren erligi»,-dedi Q. Toqaev.